Ol i Raun Longwe na Kisim Bikpela Amamas

MIPELA i bin kisim ripot i kam long Ripablik Demokratik Bilong Kongo long tupela susa em ol i bin raun longwe long wanpela hap i gat pait bilong i go long “Givim Biknem Long God” Kibung Distrik long Lisala. Long dispela kibung ol i laik kisim skul long ol samting bilong spirit na bung wantaim ol bratasista Kristen, na tu, ol i laik bungim ol brata bilong brens ofis bilong ol Witnes Bilong Jehova i kam long Kinshasa. Pait i stap insait long kantri, olsem na ol i no bin lukim wanpela brata bilong brens ofis inap planti yia. Orait nau ol i laik lukim ol.

Dispela tupela susa i raun long kanu na lusim ples bilong ol Basankusu na i go long Lisala, em longwe inap 300 kilomita na ol i raun long bikbus na tupela wara. Ol i raun inap 3-pela wik bilong kamap long Lisala. Tupela susa wantaim i mekim wok autim tok fultaim, wanpela i mekim pinis dispela wok inap 3-pela yia na narapela inap 19 yia, olsem na ol i laik autim gutnius bilong Kingdom long dispela raun. Ol i autim tok inap 110 aua long ol man ol i bungim long dispela raun, na ol i tilim 200 liklik nius na 30 magasin.

Long wara ol i mas raun namel long ol hipopotamus na ol pukpuk, em ol i save stap long dispela hap. Ol i no inap raun long wara long nait taim ples i tudak pinis! Na tu, ol i kamap long planti rot blok bilong ami.

Tru, raun bilong ol i longpela na skin bilong ol i les, tasol tupela susa i amamas long ol i mekim dispela hatwok. Tupela wantaim i tenkyu tru na i amamas long ol i stap long kibung long Lisala. Bel bilong ol i amamas tru long harim tok i tru, na ol i kisim strong long bung wantaim 7,000 brata na sista i stap long kibung. Bihain long kibung, ol i mas mekim wankain hatwok gen bilong go bek long ples bilong ol, we famili bilong ol i stap gut.