“Wantu Ol Inap i Stap Fri”

GENEVIÈVE DE GAULLE i bin kisim save long ol Witnes Bilong Jehova long banis kalabus nogut bilong ol Natsi long Ravensbrück, long hap not bilong Jemani. Em i bin raitim dispela tok antap long wanpela pas long Ogas 1945. Dispela meri em pikinini meri bilong brata bilong Charles de Gaulle, em i presiden bilong Frans long bipo.

Ol man i stap kalabus long banis kalabus nogut long Auschwitz, Polan, ol inap i go fri long Janueri 27, 1945. Kirap long 1996 i kam inap long nau, long dispela de ol Jeman i save tingim ol man i kisim nogut long taim bilong gavman bilong Hitler.

Long Janueri 27, 2003, long wanpela tok bilong tingim ol man i kisim nogut long taim bilong Hitler, presiden bilong palamen bilong provins Baden-Württemberg, Peter Straub, em i tok: “Olgeta man em bilip bilong ol long lotu o politik i mekim na ol narapela i mekim nogut long ol na ol i redi long i dai na i no laik lusim bilip bilong ol, yumi mas rispektim tru ol, na i hatwok long kamapim sampela tok bilong soim dispela kain rispek. I gat wanpela lotu tasol em ol lain bilong en i bin sakim tru ol tok bilong gavman bilong Hitler, em ol Witnes Bilong Jehova: Ol i no bin apim han bilong ol na salut long Hitler. Ol i no orait long mekim tok tru antap long ‘Hitler na Gavman’ bilong em, wankain olsem ol i no orait long insait long ami na sampela wok bilong helpim pait. Na ol pikinini bilong ol i no joinim Hitler Yut.”

Jisas Krais i tok long ol disaipel bilong em: “Ol i no bilong dispela graun, olsem mi yet mi no bilong dispela graun.” (Jon 17:16) Olsem na bilip bilong ol Witnes Bilong Jehova i as na ol i sakim Hitler, i no gat narapela as. Straub i tok moa: “Ol Witnes Bilong Jehova, em ol i mas putim pepol traiengol long klos bilong ol olsem kalabusman long banis kalabus nogut, ol tasol i gat rot long mekim wanpela samting bilong abrusim dispela hevi i painim ol. Sapos ol i sainim wanpela pepa i tokaut olsem ol i lusim bilip bilong ol, ol inap lusim kalabus.”

Long klostu olgeta Witnes, pasin bilong lusim bilip em samting ol i no inap tru long mekim. Olsem na 1,200 bilong ol i dai long taim bilong ol Natsi. Na ol i kilim i dai 270 bilong ol dispela Witnes, long wanem, ol i bin bihainim maus bilong bel na ol i no laik insait long ami. Ol i no tokaut nating, ol i bihainim tru dispela tok: “Mipela i mas bihainim tok bilong God tasol. Mipela i no ken bihainim tok bilong ol man.”​​—⁠Aposel 5:​29.

Ulrich Schmidt, presiden bilong palamen bilong provins North Rhine-Westphalia i tok, ol Witnes Bilong Jehova i no narapela kain manmeri. Nius Landtag Intern i kamapim tok bilong em, na i kolim ol Witnes olsem “ol i manmeri nating, em ol i bihainim maus bilong bel bilong ol, na bihainim tru bilip bilong ol, na kamapim olsem ol i gat strongpela bel, na bilip Kristen bilong ol i kirapim ol long sakim tingting bilong ol Natsi.” Yumi ken bilip tru olsem God Jehova i amamas long ol manmeri i stap gut long em maski ol hevi i painim ol. Sindaun 27:11 i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”

[Piksa Kredit Lain long pes 30]

Courtesy of United States Holocaust Memorial Museum