Amamas Long Ol i Tingim Baibel

MARIANNA, em wanpela Witnes Bilong Jehova long hap saut bilong Itali, em i gat 18 krismas na em laspela yia bilong em long haiskul. Em i wanskul bilong sampela arapela yangpela Witnes.

Marianna i tok: “Inap sampela yia nau, sampela bilong mipela i save ritim Baibel ves bilong de long buklet Skelim Sampela Tok Bilong Baibel Long Olgeta De long brek bilong mipela. Wanpela hap tasol we mipela inap bung em i klostu long ofis bilong ol tisa. I gat planti nois liklik. Planti tisa i lukim mipela taim ol i go i kam, na sampela i kam lukim samting mipela i mekim. Planti taim dispela i givim rot long mipela long bekim ol askim bilong ol. Klostu olgeta de wanpela tisa i kam toktok wantaim mipela. Planti ol i bin kam putim yau taim mipela i toktok long Baibel na ol i kamapim olsem ol i amamas long mipela ol Witnes i tingim ol tok bilong Baibel. Wanpela taim depiuti hetmasta i tokim mipela long mekim bung bilong mipela long ofis bilong ol tisa.

“Taim tisa bilong mi i lukim hap mipela i bung long en bilong skelim tok bilong Baibel, em i askim hetmasta long mipela i ken bung long wanpela klasrum we i no gat planti nois. Hetmasta i tok orait, na tisa bilong mi i litimapim nem bilong mipela long ai bilong olgeta long klas long mipela i stap gutpela piksa. Mipela olgeta i amamas tru long nambawan gutpela samting Jehova i givim long mipela.”