Yu Stap Olsem Wanem Long Ai Bilong God?

JISAS i mekim planti gutpela tok piksa, wanpela bilong ol em long wanpela maniman i gat bikpela hap graun. Maniman i laik wokim ol bakstua i bikpela moa bilong helpim sindaun bilong em long bihain. Tasol long tok piksa bilong Jisas, God i tok dispela maniman em i “longlong man tru.” (Luk 12:​16-21) Bilong wanem God i mekim strongpela tok olsem long em?

I luk olsem maniman i no tingim God, na tu, em i no givim biknem long God olsem gaden bilong em i karim planti kaikai. (Matyu 5:45) Em i hambak na tok: “Mi win tru ya. Mi gat planti gutpela samting i stap inap long planti yia. Orait nau mi ken i stap malolo. Bai mi sindaun na mekim bikpela kaikai oltaim na amamas i stap.” Em i ting ol gutpela samting hatwok bilong em i kamapim bai lukautim em olsem “strongpela banis.”​—⁠Sindaun 18:⁠11.

Disaipel Jems i tok lukaut long dispela pasin antap olsem: “Yupela ol man i save tok olsem, ‘Ating nau o tumora mi bai go long wanpela taun na mi bai mekim wok bisnis inap long wanpela yia. Na long dispela pasin mi bai kisim planti mani.’ Yupela i save mekim dispela kain tok, tasol yupela i no save wanem samting bai i kamap long tumora. Laip bilong yupela i olsem smok i save kamap na i stap liklik taim tasol na i pinis olgeta.”​—⁠Jems 4:​13, 14.

Dispela tok i makim stret samting i painim maniman long stori bilong Jisas. God i tokim maniman olsem: “Yu longlong man tru. Nau long dispela nait tasol bai yu dai. Na olgeta dispela samting yu bin redim i stap, em husat bai i kisim?” Olsem smok i save stap liklik taim tasol, maniman bai stap liklik taim tasol na dai, na ol samting em i ting long mekim i no inap kamap. Yumi kisimgut mining bilong dispela tok? Jisas i tok: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.” Yu stap olsem wanem long ai bilong God?