‘Sampela Man i Go Long Solwara’
LONG pasis bilong Gloucester, Massachusetts, Amerika, i gat wanpela imis bras i sanap i stap na i makim boskru i holim wil na i laik stiaim sip long taim bilong bikpela win na ren. Dispela imis i bilong tingim ol planti tausen man bilong painim pis long Gloucester em ol i bin dai long solwara. Long wanpela hap plang klostu long lek bilong en, i gat tok bilong Song 107:23, 24: “Sampela man i wok boskru long sip na ol i go long bikpela solwara long olgeta ples nabaut na i wok bisnis long bringim kago long ol manmeri. Ol dispela boskru i lukim ol samting Bikpela i mekim. Ol i lukim ol gutpela samting em i mekim long biksolwara.”
Bagarap inap painim ol man taim ol i kisim pis long ol gutpela ples bilong painim pis long solwara Atlantik. Long nau inap olsem 30,000 manmeri i stap long Gloucester. Insait long planti yia, samting olsem 5,368 man i bin lusim laip bilong ol taim ol i painim pis. Dispela hap plang i tok tu olsem: “Sampela i kisim bagarap taim strongpela win wantaim ren na traipela si i kirap long hap not-is. Sampela i dai taim liklik bot ol i stap long en i drip i go longwe long bikpela sip i bin bringim ol long ples bilong painim pis. Bikpela win na ren i mekim na sampela sip i bam na i go daun insait long solwara. Na ol traipela sip i ron long rot bilong ol na i bamim sampela sip.”
Dispela imis i makim samting nogut i bin painim ol man bilong painim pis na hatwok ol i bin mekim inap planti handet yia. Tingim aiwara bilong ol mama na famili em papa, brata, na pikinini man bilong ol i lus long solwara. Tasol God Jehova i no lusim tingting long ol mama wanpis, ol pikinini papamama bilong ol i dai pinis, na ol man i dai long solwara. Aposel Jon i tok long samting bai kamap bihain olsem: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go.” (KTH 20:13) Tru tumas, taim ol i kirap bek, ‘ol man i bin go long solwara’ bai lukim ol gutpela “samting Bikpela i mekim.”