Ol i Autim Gutnius Long Ol Yaupas

“OL I bringim tok bilong God long yupela!” Em tok dairekta bilong wanpela haus bilong ol lapun long Navalcarnero, Madrid, Spen, i mekim taim em i stori long ol visit ol Witnes Bilong Jehova i save mekim long ol lapun bilong dispela haus em i lukautim. Wanem samting i kirapim em long mekim dispela tok?

Sampela lapun i stap long Rosas del Camino, em dispela haus bilong ol lapun, ol i yaupas. Tasol ol Witnes i bin wok strong long lainim tok ples sain bilong Spen, olsem na ol inap toktok wantaim ol. Dairekta i tok amamas long ol Witnes i lainim ol dispela man long tok bilong Baibel, no gat pe. Em i luksave long ol gutpela samting i painim ol dispela lapun taim ol Witnes i lainim ol long gutnius bilong Kingdom. Na ol dispela lapun​—⁠moa yet ol man i no inap lukluk na harim gut​—⁠ol tu i amamas tru long ol Witnes i kam lukim ol.

Eulogio, em wanpela lapun i aipas na yaupas, em i stadi nau long Baibel wantaim ol Witnes Bilong Jehova. Wanpela taim tupela i stadi i stap, na wanpela lapun man i kam na givim long Witnes sotpela stori ol lapun bilong dispela haus i bin raitim bilong tok tenkyu. Nem bilong dispela stori em “Bilong Stap Olsem Wanpela Witnes.” Hap bilong dispela stori i tok: “I stap bilong ol Witnes i gat as tru bilong en, ol i save bosim gut wokabaut bilong ol, na ol i amamas long savetingting ol i kisim long Jehova. Ol i save go i kam long ol haus, long wanem, ol i bilip long Jehova.”

Em dispela pasin bilong bilip long Jehova i mekim na planti Witnes long olgeta hap bilong graun i bin lainim tok ples sain bilong ol yaupas bilong kantri bilong ol. Long dispela rot ol i autim gutpela tok bilong Baibel long ol yaupas bilong strongim bel bilong ol.