Good News for People of All Nations
DISPELA buklet i stap antap ol i bin kisim long 2004 “Wokabaut Wantaim God” Kibung Distrik bilong ol Witnes Bilong Jehova. Wanpela edisen bilong dispela buklet i gat 96 pes na i gat tok bilong Kingdom long 92 tok ples, kirap long tok ples Afrikaans i go inap long tok ples Yoruba. Ol i bin wokim dispela buklet bilong helpim wok bilong autim gutnius bilong Kingdom long planti lain man. (Matyu 24:14) Ol ekspiriens i stap daunbilo i stori long ol gutpela samting i bin kamap taim ol i yusim dispela buklet.
• Bihain long ol i kisim dispela buklet long kibung, wanpela famili Witnes i go raun long 3-pela nesenel pak. Long ol dispela pak, ol i bungim ol manmeri bilong Filipins, India, Netelan, na Pakistan. Papa bilong dispela famili i tok: “Maski ol dispela lain i save liklik long tok Inglis, ol i amamas tru taim mipela i soim gutnius long tok ples bilong ol, long wanem, ol i stap longwe tru long ples bilong ol. Nau ol inap luksave long wok yumi mekim long olgeta hap na pasin bilong yumi long stap wanbel.”
• Wanpela Witnes i soim dispela buklet long wanwok bilong em bilong India. Dispela wanwok i amamas long lukim olgeta tok ples i stap long dispela buklet na em i ritim gutnius long tok ples bilong em yet. Long dispela rot, tupela inap stori moa long Baibel. Narapela wanwok em i bilong Filipins, em i kirap nogut long lukim tok ples bilong em long dispela buklet na em i kirap lainim sampela bilip bilong ol Witnes Bilong Jehova.
• Long Kanada, wanpela meri bilong Nepal i tok orait long stadi long Baibel wantaim wanpela Witnes long rot bilong telefon, tasol em i no laik singautim dispela sista i go long haus bilong em. Tasol taim Witnes i tokim dispela meri long dispela buklet i gat gutnius long tok ples Nepali, em i amamas tru na singautim dispela sista long kam long haus bilong em. Em yet i laik lukim dispela gutnius long tok ples bilong em! Nau tupela i save mekim Baibel stadi long haus bilong dispela meri.