Helpim Ol Saina Long Meksiko
“LONG dispela taim 10-pela man bilong ol longwe ples [“bilong olgeta tok ples,” NW ] bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8:23) Long nau dispela tok profet i kamap tru long olgeta hap bilong graun. Ol man “bilong olgeta tok ples” ol i kam bung wantaim ol Israel bilong spirit bilong ol i ken lotuim God Jehova. Ol Witnes Bilong Jehova ol i laik tru long lukim truim bilong dispela tok profet. Planti bilong ol i lainim narapela tok ples na bai ol i ken autim tok.
Ol Witnes Bilong Jehova long Meksiko ol tu i save mekim olsem. Inap olsem 30,000 manmeri bilong Saina i stap long Meksiko. Long 2003, 15 bilong ol i kam long Memorial bilong tingim indai bilong Krais long Mexico City. Ol Witnes long Meksiko i luksave olsem i gat planti manmeri bilong Saina long Meksiko i laikim ol samting bilong spirit. Bilong helpim ol dispela lain, ol Witnes i stretim rot bilong wokim wanpela skul bilong lainim sampela Witnes bilong Meksiko long tok Mandarin bilong Saina. Inap 25 Witnes i insait long dispela skul. Long pinis bilong skul, wanpela mausman bilong ol lain i save mekim tok ples Mandarin bilong Saina long Mexico City i kam long gretiuesen bilong ol, na dispela i kamapim klia olsem ol manmeri i save mekim dispela tok ples i amamas tru olsem ol Witnes i mekim dispela skul. Wanpela skul bilong ol Saina i stap long Meksiko i salim tripela bilong ol dispela sumatin i go long Saina na bai ol i ken lainim gut tok ples Mandarin.
Dispela skul i lainim ol sumatin long ol tok ol i ken mekim. Taim ol i lainim pinis sampela tok, ol sumatin i kirap kwik long mekim wok long en bilong autim tok long hap bilong ol bisnis long Mexico City. Ol i kirapim 21 Baibel stadi. Ol i mekim wok long buklet God i Laik Yumi Mas Mekim Wanem? long tok ples Saina em ol i raitim long ABC olsem bilong yumi.
Olsem wanem ol Witnes em ol i kirap nau tasol long skul long tok ples Saina i mekim ol Baibel stadi? Pastaim ol inap long mekim tasol dispela tok, “Qing Du [Plis ritim]” na ol i soim wanpela paragraf na wanpela askim. Taim man bilong haus i ritim pinis paragraf na bekim tok long tok ples Saina, ol Witnes bai tok, “Shei shei [Tenkyu]” na “Hen Hao [Gutpela].”
Ol i bin mekim olsem wantaim wanpela meri i insait long lotu i gat nem Kristen. Taim ol i stadi tripela taim pinis, Witnes i stadi wantaim dispela meri i laik save sapos dispela meri i kliagut long ol samting em i lainim o nogat. Olsem na dispela Witnes i kisim wanpela brata i save mekim tok ples Saina i go wantaim em. Taim brata i askim dispela meri sapos em i gat sampela askim o nogat, dispela meri i tok: “Bilong mi ken kisim baptais, mi mas lain long swim o nogat?”
I no longtaim bihain, ol i kamapim wanpela Buk Stadi Bilong Kongrigesen na i gat 9-pela bilong Saina na 23 Witnes ol i bilong Meksiko ol i insait long dispela grup. Wanpela man Saina i save go long dispela buk stadi em i wanpela dokta, em i bin kisim Wastaua na Kirap! long tok Spen long wanpela sikmeri. Em i no save long tok Spen, olsem na em i askim wanpela long tanim sampela tok insait long ol magasin. Taim em i luksave olsem ol dispela magasin i kamapim tok bilong Baibel, em i askim dispela sikmeri long em inap kisim ol magasin long tok ples Saina. Dispela sikmeri i mekim olsem, na long rot bilong brens ofis bilong ol Witnes Bilong Jehova long Meksiko, ol i stretim rot bilong wanpela Witnes i save mekim tok Saina long i go lukim dispela man. Mama bilong em i stap long Saina i gat wanpela Baibel, na dispela dokta i bin amamas long ritim. Taim em i go long Meksiko, mama bilong em i tokim em long em i no ken lusim pasin bilong ritim Baibel. Olsem na em i wok long beten long wanpela i mas helpim em long kisim save moa long God bilong Baibel. Em i tok: “God i harim beten bilong mi!”
Wanpela famili bilong Saina tu i save go long dispela buk stadi. Ol i rentim flet bilong wanpela meri Meksiko husat i save stadi long Baibel wantaim ol Witnes Bilong Jehova. Maski dispela famili i no save long tok ples Spen, ol i save sindaun long stadi bilong dispela meri Meksiko. Bihain, ol i askim dispela Witnes i save stadi wantaim dispela meri Meksiko sapos Witnes i gat sampela buk na nius samting long tok ples Saina. Ol i kirap stadi long Baibel, na i no longtaim bihain, ol i tokaut olsem ol i laik autim tok long ol wanples bilong ol na ol i laik dediketim laip bilong ol long Jehova.
Tru, i hatwok long lainim tok ples Saina. Tasol olsem yumi lukim long ol ekspiriens nau yumi stori long en, long Meksiko na long ol narapela hap bilong graun, Jehova i save helpim of manmeri bilong kain kain tok ples, na ol Saina tu, long kisim save long laik bilong em.
[Piksa long pes 17]
Wanpela lain i lainim tok ples Saina long Mexico City
[Piksa long pes 18]
Wanpela Witnes bilong Meksiko i mekim Baibel stadi long tok ples Saina
[Piksa long pes 18]
Autim tok long ol haus long tok ples Saina long Mexico City