Diwai Bilong Nuyia—Em Samting Bilong Ol Rasia? Em Samting Bilong Ol Kristen?

“LONG yia 1830 samting, ol man i kolim diwai bilong Nuyia olsem ‘smatpela tingting bilong ol Jeman.’ Long 1839 samting, ol manmeri long St. Petersburg em ol i gat biknem, ol i kirap putim dispela diwai insait long ol haus bilong ol. . . . Ol pris pasto na ol rabisman, ol tasol i no bihainim dispela pasin. . . .

“Paslain long yia 1800, ol man i no bin laikim dispela diwai. . . . Long kastam bilong ol Rasia, dispela diwai i makim dai na ol man i save yusim bilong mekim wok bilong ‘ol spirit nogut,’ na tu, ol i save putim dispela diwai long rup bilong ol haus olsem klap samting, tasol ol dispela kastam i no stret wantaim ol senis i kamap long 1850 samting. . . . Taim ol man i wok long kisim pasin bilong putim dispela diwai long haus, ol bai tingim dispela diwai olsem samting i makim Krismas, wankain olsem diwai bilong Krismas long hap bilong Wes. . . .

“Long Rasia, hevi i bin kamap taim ol man i laik mekim dispela diwai i kamap samting bilong lotu Kristen. Misin Otodoks i bin birua long dispela samting. Ol pris pasto i lukim olsem dispela pasin i nogut tru, em pasin bilong ol haiden, na i no gat wanpela samting long en i stret long stori bilong mama i karim Jisas, na tu, dispela em pasin bilong ol man long hap bilong Wes.”​—⁠Profesa Yelena V. Dushechkina, em bikmeri bilong saiens long St. Petersburg State Yunivesiti.

[Piksa Kredit Lain long pes 32]

Photograph: Nikolai Rakhmanov