Yu Laik Kisim Ol Gutpela Pren?
KLOSTU olgeta manmeri i laik kisim ol gutpela pren. Sapos yu inap kamapim ol amamas na hevi bilong yu long wanpela gutpela pren, dispela bai mekim na yu kisim bikpela amamas moa long i stap bilong yu. Tasol olsem wanem yu inap kisim ol gutpela pren? Klostu 2,000 yia i go pinis, Jisas i kamapim olsem nambawan bikpela samting bilong pas gut wantaim narapela em pasin bilong laikim tru narapela na i no tingim yumi yet tasol. Em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Luk 6:31) Dispela tok i kamapim olsem sapos yu laik kisim ol pren, yu mas redi long givim ol samting long ol na yu no ken tingim yu yet tasol. Olsem na bilong wanpela i ken stap pren bilong yu, yu mas i stap pren bilong em. Olsem wanem yu inap i stap olsem?
Pasin pren namel long tupela man i no save kamap wantu tasol. Ol pren i no olsem ol lain em yumi save tasol long ol. Ol i manmeri yumi save pas gut wantaim ol. Yumi mas wok strong bilong kamap pren bilong narapela na stap gutpela pren bilong em i go i go. Bilong stap pren bilong narapela, yu mas putim samting ol i mas kisim i go pas long ol samting yu yet i mas kisim. Taim tupela man i stap pren, narapela i save pilim amamas bilong narapela na ol hevi bilong em tu.
Yu inap soim olsem yu pren tru bilong narapela taim yu mekim gut bel bilong em na helpim em long ol samting em i sot long en. Sindaun 17:17 (NW) i tok: “Pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” Tru tumas, sampela taim yumi pas strong moa wantaim wanpela pren, winim famili. Sindaun 18:24 (NW) i tok: “Sampela pren i tingting long bagarapim pren bilong ol, tasol i gat pren em i stap klostu tru long yumi, winim brata bilong yumi.” Olsem wanem? Yu laik kisim sampela save moa long olsem wanem yu ken kisim ol kain gutpela pren olsem? Yu laik kam insait long wanpela lain we narapela i save laikim tru narapela? (Jon 13:35) Sapos olsem, ol Witnes Bilong Jehova long hap bilong yu ol bai amamas long helpim yu long kisim ol gutpela pren.