Helpim Pikinini Long Pilim Tru Tok
SAMPELA taim yu bel hevi long lukim ol pikinini i pilai olsem ol i insait long pait? Planti taim yu inap lukim ol liklik pikinini tu i pilai olsem, long wanem, pasin pait i pulap long TV samting. Bai yu mekim wanem bilong helpim wanpela pikinini long lusim ol toi bilong pait na kisim ol gutpela toi? Waltraud i mekim wok misineri long Afrika inap longpela taim, em i painim rot long helpim wanpela liklik mangi long mekim olsem.
Bikpela pait i as na Waltraud i mas lusim kantri em i stap long en na go sindaun long narapela kantri long Afrika. Long dispela hap em i kirap stadi long Baibel wantaim wanpela mama i gat wanpela pikinini man i gat faipela krismas. Taim Waltraud i go lukim dispela mama, liklik boi i save holim toi gan na pilai, em i no gat narapela toi. Waltraud i no bin lukim em i makim wanpela samting olsem em bai sut long en, tasol oltaim dispela boi i wok long opim na pasim gan, kain olsem em i putim ol bulet i go insait.
Waltraud i tokim dispela boi: “Werner, yu save long as na mi stap long kantri bilong yu? Bikpela pait i mekim na mi mas lusim kantri mi bin stap long en na ranawe long ol man nogut i sutim ol manmeri long ol gan, em ol gan i luk wankain olsem gan bilong yu. Yu ting dispela em i gutpela samting?”
Werner i bel hevi na tok, “Nogat.”
Waltraud i tok: “Bekim bilong yu i stret.” Nau Waltraud i mekim askim olsem: “Yu save long as na mi kam lukim mama bilong yu long olgeta wik? Mipela ol Witnes Bilong Jehova i laik helpim ol man long stap wanbel wantaim God na ol narapela, olsem na mi kam.” Waltraud i kisim tok orait long mama pastaim na bihain em i tokim Werner olsem: “Sapos yu givim gan bilong yu long mi, bai mi tromoi, na bai mi givim yu wanpela toi ka i gat fopela wil.”
Werner i givim gan long em. Em i mas wet inap fopela wik pastaim, tasol bihain em i kisim nupela toi—wanpela trak ol i wokim long diwai, em i kisim wantaim bikpela amamas.
Olsem wanem? Yu save lusim haptaim long toktok wantaim ol pikinini bilong yu, olsem mekim ol tok ol inap pilim tru long bel na bai ol i amamas long lusim ol toi bilong pait? Sapos olsem yu lainim ol long gutpela samting em bai helpim ol inap oltaim bihain.