“Nambawan Gutpela Taun Tru Bilong Galili”
INAP olsem 6.5 kilomita long hap not-wes bilong Nasaret, em taun Jisas i go bikpela long en, i gat wanpela taun nem bilong en i no stap long ol Gutnius. Tasol wanpela saveman Juda long taim bilong ol aposel, em Flavius Josifas, i apim nem bilong dispela taun olsem em i “nambawan gutpela taun tru bilong Galili.” Dispela taun em Seforis. Yumi gat wanem save long dispela taun?
Bihain long dai bilong King Herot, ating long yia 1 B.C.E., ol asples bilong Seforis i bikhet long Rom, olsem na Rom i bagarapim taun bilong ol. Pikinini man bilong Herot, em Antipas, em i kirap bosim Galili na Perea, na makim Seforis olsem ples em bai wokim wanpela nupela taun we gavman bilong em i ken sindaun long en. Ol i bihainim kain stail bilong ol Grik na Rom bilong wokim haus samting long dispela taun, tasol planti bilong ol manmeri i sindaun long dispela taun em ol Juda. Profesa Richard A. Batey i tok, Seforis i kamap “taun em gavman i sindaun long en na bosim Galili na Perea,” i go inap long taim Antipas i wokim taun Taiberias long 21 C.E., olsem senis bilong en. Long dispela taim, Jisas i stap klostu long taun Seforis.
Profesa James Strange i bin painim ol samting insait long graun long taun Seforis, na em i ting dispela taun bilong bipo i gat ol haus bilong lukautim ol pepa bilong gavman na mani bilong gavman, haus bilong putim ol samting bilong pait, ol haus beng, ol haus kot samting, na ol maket bilong salim ol samting ol i wokim long simen, glas, ain, na ol bis, na ol kain kain kaikai. I gat ol man bilong wokim ol klos samting na ol man bilong salim, na ol stua we man inap baim ol basket, ol sia na tebol samting, ol sanda, na ol kain samting olsem. Ol i bin ting, long dispela taim namba bilong ol manmeri i sindaun long dispela taun em i namel long 8 tausen na 12 tausen.
Bilong kamap long Seforis man i mas lusim Nasaret na wokabaut inap wanpela aua tasol, olsem na yu ting Jisas i bin go raun long dispela taun? Ol Gutnius i no stori liklik long dispela. Tasol The Anchor Bible Dictionary i tok olsem “wanpela rot long Nasaret i go long Kana long Galili, em i katim namel long taun Seforis.” (Jon 2:1; 4:46) Man i stap long Nasaret em inap lukim ol maunten bilong Seforis, em ol i go antap inap 120 mita. Sampela man i ting taim Jisas i mekim tok piksa long “wanpela taun i stap antap long maunten, em i no inap hait,” em i toktok long dispela taun.—Matyu 5:14.
Bihain long taim Jerusalem i bagarap pinis long 70 C.E., Seforis i kamap nambawan biktaun bilong ol Juda long Galili na bihain em ples we nambawan kot bilong ol Juda i sindaun long en. Inap sampela yia, em i stap nambawan taun i gat ol skul bilong skulim ol saveman Juda.
[Mep/Piksa long pes 32]
(Bilong save ol dispela rait i stap we long pes, lukim buk o magasin)
Raunwara Galili
GALILI
Kana
Taiberias
SEFORIS
Nasaret
PEREA
[Piksa Kredit Lain long pes 32]
Pottery: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd