Yu Ting Televisen Em Gutpela Bebisita?
ATING sampela taim yu inap ting i gutpela long larim pikinini bilong yu i lukim TV taim yu mekim ol narapela wok. Tasol dispela inap mekim wanem long ol pikinini bilong yu?
Nius New York Times i tok: “Ol samting i kamap long TV inap stiaim tingting bilong ol nupela bebi tu.” I no longtaim i go pinis, ol i soim sotpela stori o piksa long TV long ol pikinini i gat wanpela krismas we wanpela meri i mekim kain kain pasin long toi. Nius Times i tok: “Taim dispela meri i mekim olsem em i pret long toi, ol bebi i no pilai moa wantaim dispela toi na ol i mekim pes olsem ol i wari, pes i drai, o ol i krai. Taim dispela meri i amamas long toi, ol bebi tu i gat laik long pilai wantaim toi.”
Tru tumas, televisen i ken mekim sampela samting long bebi. Yu ting em inap mekim sampela samting long ol inap planti yia bihain? Dokta Naoki Kataoka, em profesa bilong sik bilong ol pikinini long wanpela haus sik (Kawasaki Medical College) long Kurashiki, Japan, em i lukim planti pikinini ol i stap isi na pes bilong ol i no kamapim olsem ol i gat wanem kain tingting. Olgeta i bin lukim TV o vidio inap longpela taim. Wanpela mangi i gat 2-pela krismas i no inap toktok wantaim ol narapela na em i no save long planti tok. Em i bin lukim ol vidio long moning i go inap long apinun long olgeta de taim em i gat wanpela krismas. Mama bilong em i bihainim tok bilong dokta, na stopim pikinini long lukim ol vidio na em i kirap pilai wantaim pikinini, na long dispela rot toktok bilong em i kamap gutpela. Yes, ol papamama i mas toktok gut wantaim ol pikinini bilong ol.
God Jehova, em As bilong famili, em i tok em bikpela samting long famili i mas toktok gut wantaim. Long bipo yet em i tokim ol manmeri bilong em: “Yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela malolo na long taim yupela i wok.” (Lo 6:7) TV i no inap skulim pikinini, em wok bilong papamama long skulim pikinini na stap gutpela piksa long rot bilong toktok na “long bihainim gutpela pasin.”––Sindaun 22:6.