“Nau Mi Bilip Olsem i Gat God i Stap”
ALEXANDRA em wanpela meri Yukren i sindaun long Prague, Ripablik Sek, em i pinis long wok na i laik go bek long haus. Long ples bilong kisim bas, em i lukim wanpela liklik paus i slip long graun em ol man i kikim nabaut taim ol i wokabaut i go i kam. Taim em i kisim dispela paus na lukluk i go insait long en, em i kirap nogut long samting em i lukim. Insait long en i gat planti pepa mani em wan wan i 5,000 koruna (420 kina samting)! I luk olsem i no gat wanpela man i wok long painim dispela paus. Alexandra i bilong narapela kantri na i sindaun long Ripablik Sek, na em i hatwok long painim mani bilong lukautim famili. Em bai mekim wanem nau?
Taim em i go bek long haus, Alexandra i soim dispela paus long pikinini meri bilong em, Victoria. Ol i lukluk insait long paus bilong painim nem na atres bilong papa bilong paus, tasol ol i no painim. Tasol insait long paus i gat wanpela hap pepa i gat sampela namba long en. Long wanpela sait bilong pepa i gat akaun namba, na long narapela sait bilong pepa i gat sampela namba moa. Insait long paus i gat toksave long rot bilong painim beng na narapela pepa i tok “330,000 koruna” (26,000 kina samting). Insait long paus i gat 330,000 koruna stret.
Alexandra i ting sampela namba long pepa em telefon namba bilong beng, na em i traim long ringim beng, tasol nogat. Olsem na em na pikinini meri bilong em i go long beng na stori long samting i bin kamap. Ol i tokim beng long akaun namba ol i bin painim insait long paus, tasol beng i no gat kain akaun olsem. Long de bihain, Alexandra i kisim narapela namba i bin i stap insait long paus na i go bek long beng. Na nau ol i painimaut olsem beng i gat wanpela meri kastama i gat dispela akaun namba. Alexandra na Victoria i ringim dispela meri na meri i tokim ol olsem dispela kain mani bilong em i bin lus. Taim ol i bungim dispela meri, em i tok tenkyu tru na i askim ol, “Mi mas givim wanem samting long yupela olsem pe bilong yupela i givim bek mani bilong mi?”
Victoria i tok: “Mipela i no laik kisim wanpela samting. Sapos mipela i bin i gat laik long kisim dispela mani, bai mipela i mekim olsem.” Victoria i no save gut long tok ples Sek, tasol em i tok moa: “Mipela i givim bek mani bilong yu, long wanem, mipela i Witnes Bilong Jehova. Maus bilong bel bilong mipela em Baibel i skulim pinis, i no larim mipela long kisim samting i no bilong mipela.” (Hibru 13:18) Meri hia i amamas tru na i tok: “Nau mi bilip olsem i gat God i stap.”