Narapela Kain Siot na Pasin Bilong Mekim Ol Samting God i Laikim
KING LOUIS Namba 9 bilong Frans i bin putim kain siot olsem. Taim Bikman Thomas More i yangpela man na em i stadi bilong kamap loya, em i bin putim dispela kain siot na bai em inap wok inap 19 o 20 aua long olgeta de inap sampela mun na ai bilong em i no ken slip. Ol i tok More i bin werim dispela kain siot inap planti yia. Na taim ol i kilim i dai Asbisop Bilong Canterbury, em Thomas Becket, long bikpela haus lotu bilong Canterbury, ol i lukim dispela kain siot i stap aninit long klos bilong em. Ol dispela man i gat nem ol i bin mekim wanem wankain samting? Ol i givim pen long skin bilong ol yet long rot bilong wanpela narapela kain siot.
Ol i bin wokim dispela kain siot long gras bilong meme na em i save pas long skin taim man i werim bambai em i ken skrapim skin na givim pen long man. Ol laus i laikim tru dispela kain siot na ol i pulap tru long en. Ol i tok Thomas Becket i bin werim dispela kain siot wantaim liklik trausis ol i wokim long wankain samting. Em i werim i go inap long ol laus i pulap tru long en. Bihain long yia 1600 samting, sampela man i no wokim moa long gras bilong meme; ol i wokim long waia i gat planti sap olsem nil na i wok long sutim skin. Man i putim dispela kain siot i kisim bikpela pen moa.
Wanpela buk i tok, wok bilong dispela kain siot, na ol narapela samting bilong givim pen long skin, em bilong “daunim ol laik nogut bilong skin na bai man i ken kisim pasin bilong bihainim ol pasin God i laikim long laip bilong em.” Ol man i daunim olgeta laik bilong skin, na ol man i gat bikpela namba, ol tu i bin putim dispela kain siot. Long nau tu sampela lain pris o bruder samting ol i save mekim olsem.
Tasol pasin bilong putim dispela kain siot o daunim olgeta laik bilong skin, yu ting dispela i save mekim man i kamap man bilong mekim ol samting God i laikim? Nogat, dispela i no inap helpim man. Aposel Pol i bin mekim strongpela tok long pasin bilong “hatim tru bodi bilong yumi.” (Kolosi 2:23)a Bilong mekim ol samting God i laikim, yumi mas wok strong long kisim save long God long rot bilong stadi gut long Tok bilong em na bihainim ol dispela tok long laip bilong yumi.
[Futnot]
a Bilong kisim sampela save moa long dispela samting, lukim Awake! bilong Oktoba 8, 1997, “The Bible’s Viewpoint: Is Asceticism the Key to Wisdom?”
[Ol Piksa Kredit Lain long pes 32]
King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904