Lapun—Tasol Em Inap Mekim Ol Samting
TAIM ol man i kamap lapun, planti i kisim kain kain bagarap long skin, na ol i no inap bung wantaim ol narapela man. Dispela samting i no painim Fernand Rivarol, husat i dai long Geneva, Swiselan, taim em i gat 95 krismas. Em i stap wanpis, long wanem, meri bilong em i dai pinis na pikinini meri bilong em i marit na i stap long haus bilong em yet. Maski Fernand i no inap lusim haus, em i no pilim olsem em i stap wanpis. Planti taim em i sindaun long tebol long rum na ringim ol man long telefon na toktok wantaim ol long Baibel.
Tasol wanpela taim long laip bilong em, Fernand i bin stap long kalabus. Bilong wanem? Taim Fernand na meri bilong em i bin kamap Witnes Bilong Jehova long 1939, Wol Woa 2 i kirap long Yurop. Fernand i bihainim tok bilong Baibel na em i no laik bagarapim narapela man. Long dispela as, ol i pinisim em long wok na em i kalabus inap 5-pela yia na hap, na insait long dispela haptaim em i no inap i stap wantaim meri na liklik pikinini meri bilong em.
Fernand i tingting i go bek long dispela taim na i tok: “Planti man i ting mi lusim gutpela wok mani na larim famili bilong mi i stap nating na i no gat man bilong lukautim ol. Ol man i nolaik tru long mi na ol i ting mi wanpela man nogut. Tasol taim mi tingting long ol dispela yia i gat hevi long en, mi tingim tru pasin bilong Jehova long sapotim na helpim mipela. Planti yia i lus pinis, tasol pasin bilong mi long bilip long Jehova i strong yet olsem em i bin strong long dispela taim bipo.”
Bilip bilong Fernand i kirapim em long ringim ol narapela man na tokim ol long ol samting em i bilip na wetim, em Baibel i as bilong en. Sapos em i toktok gut wantaim wanpela man, em i salim ol nius bilong Baibel i go long dispela man. Bihain, em i ringim dispela man o meri na askim em long em i bin amamas long ritim nius o nogat. Sampela man i raitim pas bilong tok tenkyu long em, na em i amamas tru long dispela samting.
Wanpela man olsem Fernand inap ringim yu long hap yu sindaun long en. Gutpela sapos yu putim yau long tok em i mekim na bai yu ken save long ol samting em i bilip long en. Ol Witnes Bilong Jehova i save amamas long stori wantaim yu long ol samting ol i bilip long en.