‘Mangi i Gat Nainpela Krismas i Mekim na Mi Putim Yau’
TAIM ol Witnes Bilong Jehova i kam long haus bilong Wiesława long sauten Polan, em i save tok tenkyu long ol i kam, tasol em i no laik toktok wantaim ol. Wanpela taim liklik Samuel i gat 9-pela krismas i kam long haus bilong Wiesława wantaim mama bilong em. Long dispela taim Wiesława i gat laik long putim yau long tok bilong Samuel na em i kisim wanpela magasin i stori long wanpela paradais bai kamap long graun.
Bung bilong Memorial long tingim dai bilong Jisas bai kamap, olsem na Samuel i laik singautim Wiesława long kam long dispela bikpela bung. Samuel na mama i go bek lukim em na givim em pepa bilong singautim man long Memorial. Taim Wiesława i lukim Samuel i bilas gut, em tok eskius na lusim ol inap sotpela haptaim na em i go pasim ol gutpela klos. Taim em i kam bek, em i putim gut yau long tok bilong Samuel na kisim pepa bilong Memorial na i askim ol: “Mi wanpela bai kam o mi wantaim man bilong mi?” Na em i tok moa: “Maski sapos man bilong mi i no inap kam, mi tingim yu, olsem na bai mi kam.” Samuel i amamas tru olsem meri i truim tok bilong em.
Taim tok bilong Memorial i kamap, Samuel i sindaun klostu long Wiesława na soim em long Baibel olgeta skripsa brata i kolim. Dispela i kirapim tru bel bilong em. Em i amamas long Memorial na amamas tu long ol i kamapim klia ol bikpela tok. Wiesława i pilim tru ol gutpela pasin na tok welkam ol bratasista i mekim long em. Kirap long dispela taim Wiesława i gat bikpela laik long save long pasin bilong lotuim Jehova na em i kirap bung wantaim ol Witnes Bilong Jehova. Em i tok: “Mi sem olsem mi no bin putim yau long tok bilong yupela bipo. Mi mas tokaut stret olsem wanpela mangi i gat 9-pela krismas, em Samuel, i mekim na mi putim yau long tok bilong yupela.”
Olsem Samuel long Polan, planti yangpela Witnes Bilong Jehova i save litimapim nem bilong Jehova long rot bilong toktok na gutpela pasin bilong ol. Sapos yu tu i wanpela yangpela, yu inap helpim ol man i gat gutpela bel long pilim tru pasin bilong lotuim Jehova.