Painim Rot Long Biksolwara
LAIN Ailan Masal i gat inap olsem 1,200 ailan na liklik ailan, na planti bilong ol i go antap long mak bilong solwara inap sampela mita tasol. Maski yu no go longwe tumas long ol ailan, bai yu no inap lukim ol moa. Tasol taim ol man Masal i raun long solwara long kanu bilong ol i gat saman, ol inap stiaim kanu i go long ol liklik ailan bilong ol i stap insait long 650,000 skwe kilomita bilong solwara Pasifik. Olsem wanem ol inap mekim olsem? Ol i yusim wanpela kain mep ol i wokim long ol stik.
Taim ol i raun long solwara, ol Masal i kisim save olsem sapos wanpela hap graun i stap long solwara, dispela i kamapim sampela mak long ol biksi na i soim olsem wanpela ailan i stap longwe inap 30 kilomita. I gat planti kain ol mak bilong biksi ol i mas lainim, na dispela stik mep i helpim ol long tingim ol dispela mak. Ol dispela stik mep i wanem kain? Olsem yu lukim long piksa, ol i wokim ol stik long rop bilong karuka o bun bilong kokonas lip na ol i pasim wantaim na wokim dispela stik mep i kamapim ol mak bilong biksi. Ol i pasim ol liklik sel bilong solwara long stik mep bilong makim hap ol ailan i stap long en.
Inap planti yia, ol i no tokim ol narapela man long dispela stik mep, ol i stori long sampela tasol. Olsem wanem yangpela man inap lain long yusim stik mep? Long rot bilong narapela i lainim em na em yet i prektis. Man i gat save long stiaim kanu bai skulim yangpela man, ating em bai kisim em i go wantaim em long ol ailan i stap klostu. Taim yangpela man i lain long luksave long mak bilong ol biksi, em i bilip olsem em i gat save long yusim stik mep bilong em. Bihain, em wanpela inap i go na raun long solwara.
Na olsem tasol, Tok Bilong God, em Baibel, em i ken stiaim wokabaut bilong yumi. Ating pastaim wanpela i helpim yumi long kisim save long ol bikpela tok bilong Baibel. Na taim yumi wok yet long stadi long Baibel na bihainim ol stiatok bilong en, yumi kirap bilip long ol tok bilong en. God i tokim Josua, em gopas bilong lain Israel, long em i mas ritim Tok Bilong God bambai em inap “bihainim tru olgeta tok i stap long lo.” God i tok moa, na nau “olgeta arapela samting yu mekim bai i kamap gutpela tasol.” (Josua 1:8) Yes, Baibel inap soim yumi gutpela rot long bihainim.
[Piksa Kredit Lain long pes 32]
© Greg Vaughn