“Yumi Stap Bilong Mekim Wanem?”

ELIE WIESEL i bin winim Prais Nobel na abrusim bagarap em ol Natsi i kamapim. Em i tok long “nambawan bikpela askim man i mas skelim.” Em wanem askim? Em askim olsem, “Yumi stap bilong mekim wanem?”

Yu bin tingting long askim olsem? Planti i bin i gat dispela askim, tasol ol i no painim bekim bilong en. Wanpela saveman bilong Briten, Arnold Toynbee, i kamapim tingting bilong em long as na yumi stap laip, em i tok: “Wok tru bilong man em long givim glori long God na amamas long Em inap oltaim oltaim.”

Inap 3 tausen yia i go pinis, narapela man em man bilong skelim gut ol samting, em i kamapim pinis bekim bilong dispela askim. Saveman King Solomon i tok: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”​—Saveman 12:13.

Pikinini Bilong God, Jisas Krais, i wanbel long dispela stiatok. Taim Jisas i stap long graun, em i givim bel long givim glori long Papa bilong em long heven. Em i stap wokboi bilong Man Bilong Wokim em, dispela i mekim em i amamas moa. Na i bin mekim em i stap strong, em i tok: “Kaikai bilong mi, em long bihainim laik bilong [God] na long pinisim wok em i bin givim mi.”​—Jon 4:34.

Orait, yumi stap bilong mekim wanem? Wankain olsem Jisas, Solomon, na planti arapela wokboi bilong God, laip bilong yumi tu i ken i gat as tru na amamas bilong en long rot bilong mekim laik bilong God. Olsem wanem? Yu laik save moa long hau yu inap lotuim God “long strong bilong Holi Spirit na long pasin i tru”? (Jon 4:24) Ol Witnes Bilong Jehova long hap bilong yu bai amamas long helpim yu long kisim bekim bilong dispela askim, “Yumi stap bilong mekim wanem?”