Daniel na Kat Bilong Kibung

JISAS i krosim ol hetman bilong lotu em ol i ting ol i stretpela man na ol i kros taim ol i lukim ol yangpela mangi i litimapim nem bilong God. Olsem na i stret Jisas i tokim ol: “Ating yupela i no bin ritim dispela tok, ‘Ol liklik pikinini i save litimapim nem bilong yu.’ ”​—Matyu 21:​15, 16.

Daniel i gat 6-pela krismas, em i save bung wantaim wanpela kongrigesen bilong tok Rasia long Jemani, na em i kamapim klia olsem ol yangpela long nau tu i save litimapim nem bilong Jehova. Em i go wantaim mama na susa bilong em long wanpela kibung bilong ol Witnes Bilong Jehova long Duisburg. Dispela em i namba wan taim ol i go long kain bikpela kibung olsem. Olgeta samting i nupela samting long ol: hotel, bikpela lain manmeri, baptais, drama, na ol i mas sindaun isi inap tripela de. Na olsem wanem long pasin bilong Daniel? Em i mekim gutpela pasin tru. 

Long Mande bihain long kibung taim ol i kam bek pinis long haus, Daniel i kirap hariap long moningtaim bilong go long elementri skul. Tasol wanem samting i stap yet long saket bilong em? Kat i soim olsem em i wanpela man i bin go long kibung! Mama i tokim Daniel: “Kibung i pinis. Nau yu ken rausim dispela kat.” Tasol Daniel i tok: “Mi laik bai olgeta i save mi bin stap we na save long ol samting mi bin lainim.” Olsem na long dispela de olgeta em i stap long elementri skul, em i werim kat bilong em. Taim tisa bilong em i askim em long dispela kat, Daniel i stori long program bilong kibung long em.

Long dispela rot, Daniel i bihainim pasin bilong planti tausen boi na gel husat i bin litimapim nem bilong Jehova insait long planti handet yia.