Tru Graun Bilong Ol Juda i Bin i Stap Nating?
BAIBEL i tok profet olsem ol Babilon bai bagarapim graun bilong ol Juda na em bai stap nating i go inap long taim ol Juda i kam bek. (Jeremaia 25:8-11) Wanpela bikpela as na yumi ken bilip olsem dispela tok profet i bin kamap tru em stori bilong Baibel ol i raitim 75 yia bihain long namba wan lain kalabus i kam bek long ples bilong ol. Dispela skripsa i tok: “King bilong Babilon i kisim ol manmeri i no bin dai long pait, na bringim ol i go kalabus long Babilon. Na ol Juda i stap olsem wokboi na wokmeri nating bilong ol king bilong Babilon i go inap long taim kantri Persia i kamap strong na i daunim kantri Babilon.” Na long graun bilong ol Juda, Baibel i tok em “i stap nating na i malolo.” (2 Stori 36:20, 21) Olsem wanem? Ol man bilong painim ol samting bilong bipo ol i painim pinis sampela samting long ol dispela hap bilong helpim dispela stori bilong Baibel o nogat?
Long buk Biblical Archaeology Review, Ephraim Stern, wanpela profesa bilong Hebrew Yunivesiti na saveman bilong painim ol samting bilong bipo long Palestain, em i tok: “Lain Asiria na Babilon, tupela i bin bagarapim tru bikpela hap graun bilong kantri Israel, tasol ol samting ol i painim i soim olsem tupela kantri i bin bihainim narapela narapela pasin.” Em i tok moa: “Ol Asiria i bin larim ol man i stap long Palestain, tasol ol Babilon i no bin mekim olsem. . . . Mipela i no painim wanpela samting i soim olsem i gat man i bin i stap long dispela hap. . . . Ples i stap nating tru i go inap long taim bilong ol Persia. Olgeta taun ol Babilon i bagarapim ol i stap nating, i no gat wanpela taun we ol man i kam sindaun long en.”
Profesa Lawrence E. Stager bilong Harvard Yunivesiti i wanbel long dispela tok. Em i tok: “Long olgeta hap bilong Filistia, na bihain long olgeta hap bilong Juda, pasin bilong king bilong Babilon long bagarapim tru graun i mekim na hap graun i stap long hap wes bilong wara Jordan i stap nating, olsem wanpela ples drai.” Stager i tok moa: “Tasol ol samting i soim olsem, taim Bikpela King Sairus bilong Persia, em man i daunim Babilon, i kamap king, . . . i gat ol man i stap gen long Jerusalem na Juda, long wanem, planti Juda i bin go bek long as ples bilong ol.”
Tru tumas, tok bilong Jehova long graun bilong Juda bai i stap nating i kamap tru. Olgeta samting Jehova i tok profet long en i save kamap tru tasol. (Aisaia 55:10, 11) Yumi ken bilip tru long Jehova na olgeta tok promis bilong em i stap long Tok bilong em, em Baibel.—2 Timoti 3:16.