Krismas—Ol i Bihainim Wanem Kain Pasin?
INAP tenpela yia i go pinis, nius U.S.News & World Report i kamapim stori “Painim As Bilong Krismas.” Dispela stori i toktok long pasin bilong mekim Krismas, olsem em i “taim bilong tingim lotu tasol na i no tingim tumas ol samting bilong wok bisnis, o nogat.” Yu ting ol samting i wok long kamap olsem?
Dispela stori i kamapim sampela tingting long as na yumi no ken ting olsem. Em i tok: “I kam inap long yia 320 samting, long taim Konstantin . . . i stap king bilong Rom, i no gat wanpela ripot i makim taim stret bilong tingim de mama i karim Jisas.” Dispela i kamapim klia “olsem i no gat wanpela man i save tru long taim em mama i karim Jisas.” Stori i tokaut olsem “ol gutnius i no bin kolim yia, mun, na de stret.” Wanpela savemeri long Yunivesiti Bilong Texas i tok, “ol Kristen bilong bipo ol i no bin mekim bung bilong Krismas.”
Aninit long liklik het tok, “Ol i Makim Nating,” dispela stori i skelim “as na lotu i bin makim Disemba 25.” Em i tokaut olsem: “Planti man i ting ol i bin kisim dispela holide long bikpela de Saturnalia na ol narapela bikpela de bilong ol haiden na mekim i kamap bikpela de bilong lotu Kristen.” “Taim ol bikman bilong lotu i makim pinis bilong mun Disemba olsem taim bilong Krismas, ol i kirapim planti man moa long tingim de mama i karim Jisas, long wanem, dispela em taim we ol man i save mekim ol bung bilong ol bilong amamas.” Long 1850 samting, tingting bilong ol man i senis na ol i kirapim pasin bilong baim na givim presen. “Wantu nupela pasin bilong givim presen long taim bilong Krismas i kamapim ol bikpela wok bisnis, na i no longtaim na ol bisnisman na ol man bilong tokaut long ol samting bilong wok bisnis long rot bilong televisen na niuspepa, ol i kirap long litimapim dispela taim bilong Krismas.”
Olsem na yumi save, pasin bilong tingim Krismas long nau i no stap moa olsem samting bilong lotu tasol. Maski wok bisnis i insait tru long pasin bilong mekim Krismas long nau, i no gat wanpela taim we ol trupela Kristen i bin tingting long mekim bung bilong tingim de mama i karim Jisas. Tasol Baibel i tok, pe bilong baim bek man em Krais i bin givim taim em i dai na kirap bek i go long heven, dispela i bikpela samting. (Matyu 20:28) Em i bikpela samting tru long nau na long olgeta taim bihain.