Man na Meri​—Narapela i Stap Bilong Helpim Narapela

KIRAP long bipo na i kam inap long nau, man na meri i gat laik tru long i stap wantaim. God i bin wokim ol olsem. Jehova i bin luksave olsem i no gutpela long namba wan man, Adam, i stap wanpis. So God i “mekim kamap wanpela poroman bilong helpim em.”

Jehova i mekim Adam i slip i dai tru, na em i kisim wanpela bun long banis bilong em na “God i wokim wanpela meri long dispela bun . . . na bihain em i bringim meri i go long man.” Taim Adam i bungim dispela naispela meri Jehova i bin wokim, em i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi.” Iv em i gutpela olgeta na em i gat ol gutpela pasin bilong ol meri, olsem na Adam i laikim em tru. Adam em i gutpela olgeta na em i gat ol gutpela pasin bilong wanpela man tru na i stret meri i rispektim em. God i wokim meri bilong man na man bilong meri. Baibel i tok: “Man i save lusim papamama na i pas wantaim meri bilong en, na tupela i kamap wanpela bodi tasol.”​—Stat 2:​18-​24.

Tasol long nau ol famili i bruk, na planti taim man na meri i save mekim nogut long narapela narapela na ol i tingim ol yet tasol. Pasin bilong meri i resis wantaim man i mekim na ol i no sindaun gut wantaim. Ol dispela kain samting i no stret wantaim samting God i tingting pinis long man na meri i mas mekim. God i wokim man bilong mekim wanpela gutpela wok tru hia long graun. Wok bilong meri em bilong mekim gutpela wok na i stap olsem helpim bilong man. Tupela i stap bilong wok gut wantaim. Kirap long taim God i bin wokim man na meri na i kam, ol man na meri i pret long God ol i bin wok strong long inapim gutpela wok Jehova i givim long ol. Taim ol i mekim olsem dispela i bin helpim ol long i stap amamas na belgut. Wanem dispela gutpela wok? Olsem wanem yumi ken inapim dispela wok?

[Piksa long pes 3]

God i wokim man na meri bilong mekim gutpela wok