Tru i No Hatwok, Tasol Yu Ting Tok Bilong En i Stret?
LONG Septemba 2005, Sios Bilong Inglan i amamas long givim tok orait long nupela Baibel ol i kamapim, ol i kolim The 100-Minute Bible. Ol i wokim dispela Baibel bambai man i ken ritim insait long 100 minit tasol. Ol i sotim Ol Skripsa Hibru bilong Baibel na i gat 17 pes tasol, na Ol Skripsa Grik bilong Baibel i gat 33 pes, na long dispela rot ol i lusim ol tok em wanpela man i kolim olsem “ol tok yumi save les long ritim.” Tru, i no hatwok long ritim dispela Baibel, tasol yu ting tok bilong en i stret?
Ol i lusim nem bilong God, Jehova, na tu, ol man bilong stadi long Baibel bai lukim sampela samting moa ol i senisim. (Song 83:18, NW) Olsem: Pes 1 i tok God i bin “wokim skai na graun insait long 6-pela de.” Tasol Stat 1:1 i tok: “Bipo bipo tru God i mekim kamap skai na graun.” Na bihain long dispela, Baibel ol i bin raitim long pastaim tru i stori long ol narapela samting bilong graun God i bin wokim insait long 6-pela “de,” o haptaim. Orait nau Stat 2:4 (NW) i stori long haptaim God i bin wokim olgeta samting na i kolim olsem “de God Jehova i bin wokim graun na skai.”
Dispela The 100-Minute Bible i tok, Jop, em wanpela man i save stap gut long God em i bin kisim nogut long han bilong “wanpela wokman bilong [God], em Satan, . . . em i gat wok long kotim ol manmeri bilong graun.” Tasol dispela tok i kranki, long wanem, mining bilong nem “Satan” i olsem “Birua.” Olsem na Satan i no wokman bilong God, nogat. Em i nambawan birua bilong God na em i makim em yet olsem man bilong kotim ol manmeri bilong graun.—KTH 12:7-10.
Olsem wanem long hap bilong Ol Skripsa Grik long The 100-Minute Bible? Long tok piksa bilong ol sipsip na meme, dispela nupela Baibel i tok Jisas i save laikim ol man i bin helpim “wanpela man, maski em i man nating tasol.” Tasol Jisas i bin tok em i save mekim gut long ol man i save mekim gutpela pasin long ol man i bihainim lek bilong em—em ol “brata” bilong em. (Matyu 25:40) Na sotpela tok dispela Baibel i mekim long Kamapim Tok Hait i tok, “Rom, em bikpela taun Babilon, bai i bagarap olgeta.” Tasol ol man i stadi long Baibel ol i save pinis, long Baibel ol i bin raitim long pastaim tru i no gat wanpela tok olsem “bikpela taun Babilon” i makim Rom, nogat.—KTH 17:15–18:24.
Ol man i laik kisim save long Man Bilong Wokim yumi na save long ol samting em i tingting pinis long mekim, ol i mas i gat Baibel olgeta, em ol i no bin rausim sampela tok bilong en. Tru, bilong ritim Baibel olgeta, bai yu lusim bikpela hap taim moa, winim 100 minit, tasol sapos yu mekim olsem, bai yu kisim gutpela samting tru. (Jon 17:3) Mipela laik bai yu wok strong long mekim olsem, na bai yu kisim gutpela samting tru long en.—2 Timoti 3:16, 17.