“Bikpela, Bilong Wanem Yu No Mekim Wanpela Samting?”
EM TOK Pop Benedict 16 i bin mekim taim em i go raun lukim wanpela ples kalabus bilong bipo, long Auschwitz, Polan, long Me 28, 2006. Long dispela hap we ol Natsi i bin kilim i dai planti handet tausen Juda na ol narapela, em i tok: “Dispela ples i mekim na planti askim i kamap! Oltaim ol man i save askim: Bilong wanem God i no bin mekim wanpela samting long dispela taim? Bilong wanem em i larim pasin bilong kilim man i stap longpela taim na dispela pasin nogut i go bikpela? . . . Long pasin daun yumi mas wok yet long singaut long God olsem: Yu mas mekim sampela samting! No ken lusim tingting long mipela ol manmeri em yu bin wokim!”
Tok bilong pop i kirapim ol man long kamapim kain kain tingting. Sampela i luksave olsem i gat sampela samting em pop i no laik stori long en. Em i no laik toktok long pasin bilong biruaim ol Juda—em dispela pasin i insait long ol samting nogut tru i bin kamap long ples kalabus long Auschwitz. Sampela i tingim tok bilong em i olsem em i laik daunim tok bilong Pop John Paul 2, husat i bin tokim ol man long ol i mas lusim ol rong em misin i bin mekim. Wanpela niusman bilong lotu Katolik, em Filippo Gentiloni, i tok: “Taim pop i kamapim dispela askim olsem bilong wanem God i no mekim wanpela samting—em wanpela askim i no gat bekim—planti man i laik bai pop i bekim wanpela askim i no hatwok long bekim, olsem: Bilong wanem Pius 12 i no bin mekim wanpela samting?” Ol dispela man i tok long pasin bilong Pop Pius 12 long em i no bin tokaut long pasin nogut em ol Natsi i bin mekim bilong bagarapim na pinisim lain Juda.
Dispela pasin ol i bin mekim, na ol pasin i bin kamap long ol narapela taim bilong kilim i dai na pinisim wanpela lain olgeta, ol dispela pasin i kamapim klia olsem ol “bikman i [bin] wok long daunim ol arapela manmeri na mekim nogut long ol.” (Saveman 8:9) Tasol i no olsem Man Bilong Wokim ol man i stap isi tasol na em i no mekim wanpela samting, nogat. Long rot bilong Baibel em i bin tokaut long as na em i larim pasin nogut i stap. Na tu, God i tokim yumi olsem em i no bin lusim tingting long ol man. Tru tumas, dispela haptaim we God i bin larim ol man long bosim ol yet, dispela haptaim klostu nau bai pinis. (Jeremaia 10:23) Olsem wanem? Yu laik kisim sampela save moa long ol samting God i laik mekim long yumi ol man? Long rot bilong Baibel, ol Witnes Bilong Jehova bai amamas long helpim yu long save long bekim bilong ol dispela askim em Pop Benedict 16 i hatwok long bekim.
[Piksa Kredit Lain long pes 32]
Oświęcim Museum