Tang i Gat Bikpela Strong
TANG bilong jiraf i longpela inap 45 sentimita na inap tanim tanim hariap na i gat bikpela strong inap long kamautim ol lip long ol han bilong diwai. Hevi bilong tang bilong blu weil em i wankain olsem hevi bilong wanpela elefan. Tingim bikpela strong blu weil i mas i gat bilong em i ken mekim wok long en!
Tang bilong ol man i liklik samting tru taim yumi skelim sais, hevi, na strong bilong en wantaim tang bilong jiraf na blu wel. Tasol tang bilong man i gat narapela kain strong i bikpela moa, long wanem, tang i save kamapim toktok. Baibel i tok long dispela liklik hap bilong bodi bilong man olsem: “Toktok bilong yu em inap mekim man i stap gut na em inap long bagarapim man.” (Sindaun 18:21) Tru tumas, planti taim yumi harim olsem man i bin mekim wok long maus bilong em long sutim ol tok giaman na stori giaman we i bin kamapim bagarap, o dai tu, long ol man i no gat asua.
Na tu, tok i bagarapim bel bilong narapela i mekim na ol man i bin stap gutpela pren inap longpela taim ol i no pren moa. Bel na tingting bilong sampela i bin bagarap long ol hatpela tok em wanpela i bin sutim long ol. Ol man i bin sutim planti tok giaman long Jop, na em i tok: “Tok bilong yupela i givim bikpela pen long mi na i bagarapim mi tru. Wanem taim bai yupela i lusim dispela kain tok?” (Jop 19:2) Disaipel Jems i kamapim klia olsem maus i gat strong bilong bagarapim narapela sapos man i no bosim gut. Em i tok: “Maus em i liklik hap tasol bilong bodi, tasol em i save hambak moa yet na litimapim nem bilong em yet. Yumi save, liklik paia tasol em inap kirapim bikpela paia moa long bus na kukim olgeta diwai. Na maus em i olsem paia.”—Jems 3:5, 6.
Tasol maus em i gat strong tu bilong helpim man long stap laip. Tok man i mekim i soim olsem em i pilim hevi bilong narapela, na tok bilong mekim gut bel i bin helpim sampela long winim sik bilong bel hevi na pasim sampela narapela long kilim i dai ol yet. Taim ol man bilong kisim drak na ol raskol ol i bin bihainim ol tok bilong givim gutpela tingting long ol, ol i abrusim dai. Em nau, tok bilong stretpela man i olsem “diwai bilong givim laip” na i olsem “gutpela piksa ol i wokim long gol na bilasim long silva.”—Sindaun 15:4; 25:11.
Tasol nambawan gutpela wok tru yumi inap mekim long maus, em long litimapim nem bilong God Jehova, autim gutnius bilong Kingdom Bilong God, na skulim ol narapela long ol gutpela tok i tru bilong Baibel. Bilong wanem i olsem? Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3; Matyu 24:14; 28:19, 20.