‘Stap Oltaim Olsem Mun i Stap Long Skai’
OL MAN bilong raitim ol stori na singsing, ol i litimapim mun olsem em i naispela samting tru. Olsem: Wanpela song em spirit bilong God i stiaim wanpela man long raitim, i stori long wanpela meri em “pes bilong en i klia tru olsem lait bilong mun.” (Solomon 6:10) Na man bilong raitim song i tok long mun olsem, em i save ‘stap oltaim long skai na i soim olsem tok bilong God i tru olgeta.’ (Song 89:37) Wanem insait bilong dispela tok?
Long olgeta 27.3 de, mun i save wokabaut raunim graun olgeta na i save mekim olsem long olgeta taim. Olsem na taim Baibel i tok mun i save stap olsem oltaim, dispela i makim olsem yumi inap bilip tru long mun bai mekim wok bilong en. Tasol ating man bilong raitim song i bin tingim samting i bikpela samting moa. Long wanpela song olsem tok profet em i bin mekim long Kingdom—em Kingdom Jisas i bin skulim ol disaipel long beten long en—em i tok mun i save ‘stap oltaim long skai na i soim olsem tok bilong God i tru olgeta.’—Matyu 6:9, 10.
Winim 3,000 yia i go pinis, God Jehova i mekim kontrak bilong Kingdom wantaim King Devit bilong Israel bilong bipo. (2 Samuel 7:12-16) Wok bilong dispela kontrak em bilong wokim rot na bai i gat as na Jisas Krais i ken kisim wok king bilong Devit, na sindaun long sia king inap oltaim oltaim. (Aisaia 9:7; Luk 1:32, 33) Man bilong raitim song i toktok long “tumbuna” bilong Devit, olsem: “Bai ol [em] i stap olsem oltaim, olsem mun i stap long skai, na i soim ol manmeri olsem tok bilong mi i tru olgeta.”—Song 89:36, 37.
Olsem na dispela ‘lait bilong nait’—em mun—em i gutpela samting bilong kirapim yumi long tingim olsem wok king bilong Krais bai stap inap oltaim oltaim. (Stat 1:16) Daniel 7:14 i tok long Kingdom bilong Krais olsem: “Em bai i stap king i gat strong oltaim oltaim, na wok king bilong en bai i no inap pinis.” Olsem na mun em i wanpela samting i kirapim yumi long tingim Kingdom na ol gutpela samting em bai kamapim long ol man.
[Piksa Kredit Lain long pes 32]
Moon: NASA photo