Yu Ting God i Lukluk Long Yu?
OLSEM WANEM? Jehova, Man Bilong Wokim olgeta samting, em inap lukim ol samting? Yes, em inap lukim! Baibel i tok: “God i bin wokim ai bilong yumi. Orait ating em yet i no inap lukluk, a?” (Song 94:9) Jehova inap lukim gut ol samting, winim tru ol man. Em i save long lukluk bilong man, na tu, em i “traim bel bilong yumi,” na em inap “skelim pasin bilong yumi.” (Sindaun 17:3; 21:2) Yes, em inap skelim tingting na laik bilong bel bilong yumi, na samting i kirapim yumi long mekim ol samting.
Jehova i save long ol hevi inap painim yumi, na em i save harim ol beten bilong yumi. Man bilong raitim song i tok: “Bikpela i save lukautim ol stretpela manmeri, na em i save harim beten bilong ol. God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:15, 18) Jehova i save yumi gat wanem kain sindaun na em i save harim beten bilong yumi; yumi save long dispela na dispela i mekim gut bel bilong yumi, a?
God Jehova i save long ol samting ol man i mekim maski ol i mekim long pasin hait. Yes, “olgeta samting i op olgeta na i stap ples klia tru long ai bilong God.” (Hibru 4:13) Olsem na maski yumi mekim gutpela samting o samting nogut, God i lukim olgeta dispela samting. (Sindaun 15:3) Olsem: Stat 6:8, 9 i tok, “Bikpela i amamas long Noa” na em i “pren tru bilong God.” Yes, Jehova i laikim na i blesim Noa, long wanem, Noa i bihainim na sambai long ol stretpela stiatok bilong God. (Stat 6:22) Tasol ol man long taim bilong Noa, ol i mekim pasin sem na ol i pait na bagarapim man. God i lukim ol samting ol i mekim. Em “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Bihain, Jehova i bagarapim ol man nogut, tasol em i lukautim Noa na famili bilong em na ol i abrusim bagarap.—Stat 6:5; 7:23.
Olsem wanem? Taim Jehova i lukluk long yu, em i amamas long yu? Tru tumas, “Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Stori 16:9) Klostu nau em bai rausim gen long graun olgeta man nogut na kisim bek ol man i daunim nem bilong ol yet.—Song 37:10, 11.