Pasin Bilong Raitim Tok Em Bikpela Samting Long Lain Israel Bilong Bipo
OLSEM WANEM? Yu bin ritim sampela hap bilong buk Iliad o buk Odyssey, em tupela bikpela stori bilong ol Grik bilong bipo? Ating ol i bin raitim ol dispela stori 700 o 800 yia paslain long Krais. Taim yumi skelim dispela tupela buk wantaim Baibel, em buk ol i bin kirap raitim planti handet yia paslain, yumi kisim save long wanem samting? Wanpela buk (The Jewish Bible and the Christian Bible) i tok: “Baibel i gat olsem 429 stori long pasin bilong rait na ol rait samting. Dispela em i bikpela samting taim yumi skelim wantaim buk Iliad, em i gat wanpela stori tasol long pasin bilong rait, na buk Odyssey i no gat wanpela stori long pasin bilong rait samting.”
Wanpela buk (The Oxford Encyclopedia of Archeology in the New East) i tok, “long Israel bilong bipo i luk olsem pasin bilong raitim tok em i wanpela bikpela hap pasin bilong lotu.” Olsem: Ol i bin raitim kontrak bilong Lo na bihain ol i save ritim planti taim long olgeta man, meri, na pikinini. Na tu, ol wan wan inap ritim na stadi long en long hap bilong ol yet o ol inap bung long ol liklik grup bilong mekim olsem. Taim saveman Alan Millard bilong University of Liverpool i skelim pinis sampela samting bilong Lo, em i tok: “Em i klia tru olsem maski ol Israel i gat wanem kain sindaun, olgeta i save long rit na rait.”—Lo 31:9-13; Josua 1:8; Nehemia 8:13-15; Song 1:2.
Aposel Pol i stori long ol Kristen i mas i gat wanem tingting long ol rait holi, em i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” Olsem wanem? Yu yet i save kamapim klia olsem yu laikim Baibel long rot bilong ritim ol tok bilong en long olgeta taim?—Rom 15:4.