Yu Save Autim Bilip Bilong Yu Taim Rot i Op?
“OLSEM WANEM? I gat tok tru i stap?” Em het tok bilong wanpela resis bilong raitim stori long Polan. Ol tok i stori long pasin bilong raitim stori i tok: “I no gat wok long mipela i save long tok tru. No gat wanpela man i laik save long tok tru. I no gat tok tru i stap.” Agata i gat 15 krismas, em i wanpela sumatin bilong haiskul na em i wanpela Witnes Bilong Jehova, em i laik stori long ol bilip bilong lotu bilong em long ol narapela long dispela taim rot i op.
Bilong redim ol samting bilong raitim dispela stori, pastaim Agata i beten askim Jehova long stiaim em, na nau em i kirap long bungim ol tok bilong dispela stori. Em i kisim sampela tok moa bilong dispela samting long Wastaua bilong Julai 1, 1995. Em i raitim dispela askim em Pontius Pailat i bin askim Jisas long en: “Tok tru, em wanem samting tru?” (Jon 18:38) Agata i tok dispela askim i kamapim wanpela kain tingting bilong ol man, i olsem ol i tok: ‘Tok tru em i wanem samting? I no gat tok tru i stap!’ Agata i tok: “Askim bilong Pailat i kirapim mi long tingim gen ol tok long pasin bilong raitim stori.”
Bihain em i stori long dispela tingting i wok long kamap olsem—wanem samting i tru long wanpela man, ating em i no tru long narapela man, na ating tingting bilong tupela wantaim i stret o nogat, yumi no save. Em i kamapim kain askim olsem, “Husat bilong yumi inap raun long balus sapos yumi no bilip olsem i gat sampela lo bilong antap—em ol lo i tru—i mekim na ol balus inap flai antap?” Bihain em i makim Baibel na i tok: “Bilip tru long Tok Bilong God, long wanem, planti samting i kamapim klia olsem ol tok bilong en i tru.” Tok Agata i mekim i kamapim klia olsem ol man husat i gat laik long painim tok i tru ol bai painim sapos ol i gat pasin bilong i no les kwik.
Agata i winim wanpela spesel setifiket na em inap kamapim bilip bilong em long ai bilong klas olgeta. Sampela wanskul bilong em i amamas long em i stadi long Baibel wantaim ol. Agata i amamas olsem em i kamapim bilip bilong em long planti narapela long dispela taim rot i op. Yes, taim yumi redi long autim bilip bilong yumi taim rot i op, dispela inap kamapim gutpela samting. Yu inap painim wanem ol rot bilong autim bilip bilong yu?