“Plis Kisim Dispela Liklik Samting Mi Givim”

DISPELA tok i stap long wanpela pas em brens ofis bilong ol Witnes Bilong Jehova long Rasia i bin kisim. Pas i kam wantaim wanpela bikpela boks i pulap long ol soks em wanpela i bin wokim long gras bilong sipsip.

Dispela boks i gat ol soks em presen i kam long wanpela sista i gat 67 krismas, nem bilong em Alla. Em wanpela Witnes Bilong Jehova long wanpela kongrigesen i stap long hap Is bilong Rasia. Alla i bin mekim wok bilong Jehova na givim bel tru long autim tok bilong Kingdom winim 10-pela yia. Tasol sik strok i kisim em na wantu hap skin bilong em i paralais. Tasol pasin laikim i kirapim em long bihainim wankain pasin olsem Dorkas long taim bilong ol aposel​—em i save wokim klos samting bilong ol wanbilip.​—Aposel 9:​36, 39.

Long pas bilong em, Alla i tok: “Mi no inap mekim wok long lek bilong mi, tasol mi inap mekim yet wok long han bilong mi. Olsem na mi save mekim wok autim tok long rot bilong raitim ol pas.” Na em i tok moa: “Mi tingting olsem, mi inap mekim yet wok long han bilong mi olsem na mi wokim sampela soks. Na mi laik bai yupela i ken givim ol dispela soks long ol brata na sista husat bai mekim wok bilong sanapim ol Haus Kingdom long ol kol ples olsem long hap Is bilong Rasia na Saibiria.”

Jisas i tok long ol gutpela disaipel bilong em na em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Pasin laikim em Alla i kamapim em wanpela mak bilong ol disaipel tru bilong Jisas.