Yu Ting Jisas i Gat Wanpela Baibel Bilong Em Yet?
NOGAT, Jisas i no bin i gat wanpela Baibel bilong em yet. Bilong wanem? Long taim bilong Jisas, i no bin i gat Baibel olgeta olsem yumi gat long nau. Tasol long ol sinagog, olsem haus lotu bilong ol Juda, ol i bin bungim ol skrol i gat ol rait long en, em ol dispela rait i kamap hap bilong Baibel, em yumi holim long nau. Jisas i ritim skrol i gat tok bilong Aisaia long en long sinagog long Nasaret. (Luk 4:16, 17) Aposel Pol i harim ‘ol hetman bilong haus lotu i ritim tok bilong lo na tok bilong ol profet’ long Antiok, Pisidia. (Aposel 13:14, 15) Na disaipel Jems i tok “long olgeta de Sabat ol i save ritim tok bilong em [Moses] insait long ol haus lotu.”—Aposel 15:21.
Olsem wanem? Olgeta wan wan man long taim bilong ol Aposel i bin i gat ol skrol bilong ol yet bilong ol Rait Holi? Man Itiopia, em ofisa bilong Kwik Kandesi, i gat ol skrol bilong em yet, long wanem, em i “sindaun long karis bilong en, na i ritim buk bilong profet Aisaia” taim disaipel Filip i bungim em long rot i go long Gasa. (Aposel 8:26-30) Aposel Pol i tokim Timoti long bringim “ol buk . . na lukaut tru bai [em i] no lusim tingting long ol dispela buk ol i bin wokim long skin bilong abus.” (2 Timoti 4:13) Maski Pol i no kolim stret wanem kain ol buk o skrol, tasol ating ol dispela skrol em ol hap bilong Ol Skripsa Hibru.
Alan Millard, saveman bilong ol tok ples Semait, i tok, namel long ol Juda, “em ol bikman bilong Palestain, ol man i ting ol i gat bikpela save, na sampela Farisi na ol tisa, olsem Nikodemus,” em ol dispela kain man tasol i gat ol skrol bilong Ol Skripsa Hibru. Wanpela as bilong dispela em pe bilong ol skrol bilong Baibel. Millard i skelim olsem “pe bilong wanpela skrol bilong Aisaia em inap olsem siks i go ten mani silva,” na em i tok olsem wanpela Baibel olgeta bilong Ol Skripsa Hibru bai “i gat 15 i go inap 20 skrol,” na pe bilong en em inap long pe man i kisim long wok insait long sikspela mun.
Baibel i no tok Jisas o ol disaipel bilong em ol i bin holim sampela skrol bilong Baibel bilong ol yet. Tasol yumi save Jisas i save gut long ol tok bilong Baibel na em inap kamapim ol tok bilong en o em inap holim ol tok bilong Baibel long tingting na kolim. (Matyu 4:4, 7, 10; 19:4, 5) Dispela i mas kirapim yumi long nau long save gut long ol tok bilong Baibel, long wanem, Baibel i stap long planti hap na planti man inap long baim.