Wanpela Gutpela Tingting
TRIPELA yangpela man long Sentral Afrika ol i laik i go long wanpela kibung distrik i kamap long hap bilong ol. Ol bai go olsem wanem? Ples em kibung bai kamap long en em i stap longwe inap 90 kilomita na rot i go long dispela hap i nogut na i gat planti das, na i no gat ka samting bilong kisim ol i go. Ol i laik kisim tripela baiskol bilong yusim, tasol ol i no inap painim ol strongpela baiskol inap long raun longwe.
Wanpela elda long kongrigesen bilong ol i lukim hevi bilong ol na em i givim baiskol bilong em yet—em olpela tasol i wok gut yet. Em i stori long samting em na ol narapela i bin mekim long bipo bilong i go long wanpela kibung. Elda i tokim ol olsem ol tripela wantaim i ken yusim wanpela baiskol. Em wanpela gutpela tingting, tasol em i hatwok. Olsem wanem tripela man inap yusim wanpela baiskol tasol?
Dispela tripela yangpela brata ol i no laik wokabaut long bikpela san, olsem na ol i bung long moningtaim tru na pasim ol kago bilong ol long baiskol. Namba wan brata i kalap long baiskol em i kikim baiskol na i go pas, na narapela tupela i wokabaut hariap na bihainim em. Taim brata i kikim baiskol i go inap 500 mita, em i stop na sanapim baiskol wantaim kago arere long wanpela diwai. Em i putim baiskol long ples we tupela brata i ken lukim na ol narapela man i no ken stilim. Orait nau namba wan brata i wokabaut i go.
Taim tupela narapela i kam kamap long hap baiskol i stap long en, wanpela i kalap long baiskol na i ron i go na narapela i wokabaut yet inap narapela 500 kilomita samting, na bihain em taim bilong namba tri brata long ron long baiskol. Dispela tripela brata i bin stretim gut ol samting na strongim tingting bilong ol long mekim olsem, olsem na ol i bin sotim wokabaut bilong ol long 90 kilomita i kam daun long 60 kilomita. Hatwok bilong ol i no lus nating. Ol i bung wantaim ol bratasista Kristen bilong ol long kibung na amamas long kisim planti gutpela tok bilong Baibel. (Lo 31:12) Olsem wanem? Bai yu mekim olgeta samting yu inap mekim bilong i go long kibung distrik long hap bilong yu long dispela yia?