Skulim Ol Pikinini Bilong Yu

Kandere Bilong Pol i Seivim Laip Bilong Ankol Bilong Em

YU SAVE olsem aposel Pol i gat ol wanblut em ol i disaipel bilong Jisas?a​​​— Wanpela susa bilong Pol na pikinini man bilong em, ol i disaipel bilong Jisas. Na dispela pikinini man i bin seivim laip bilong Pol! Yumi no save long nem bilong em o nem bilong mama bilong em, tasol yumi save long samting dispela pikinini i bin mekim. Yu laik harim stori bilong dispela samting?​​—

Pol i kam bek long namba tri raun bilong wok misineri bilong em na em i stap long Jerusalem. Em yia 56 C.E. samting. Ol i bin arestim Pol na em i mas kamap long kot. Tasol ol birua bilong Pol i no laik bai em i kamap long kot. Ol i laik em i mas dai! Olsem na ol i stretim rot bilong 40 man samting bai hait long rot bilong kilim i dai Pol.

Tasol kandere bilong Pol i harim stori long dispela plen. Yu save em i mekim wanem?​​​— Em i go long Pol na tokim em long dispela samting. Wantu tasol Pol i tokim kepten bilong ami olsem: “Bringim dispela yangpela man i go long namba wan ofisa. Em i gat wanpela tok em i laik givim long em.” Kepten i kisim em i go long namba wan ofisa, Klodius Lisias, na i tokim em olsem dispela yangpela man i gat wanpela bikpela tok em i laik kamapim. Klodius i kisim kandere bilong Pol i go long sait, na yangpela man i tokim em long olgeta samting.

Klodius i tok lukaut long kandere bilong Pol olsem: “Yu no ken tokim wanpela man long yu bin kamapim dispela tok long mi.” Orait em i singautim tupela kepten bilong ami na i tokim ol long kisim 200 soldia, 70 soldia i save sindaun long hos, na 200 soldia i save holim spia, na redi long mats i go long Sisaria. Long 9 klok long dispela nait yet, 470 man i kisim Pol i go gut long Gavena Feliks bilong Rom, long Sisaria. Klodius i raitim pas i go long Feliks na i tokim em long plen ol man i bin mekim bilong kilim i dai Pol.

So ol Juda i mas bungim Pol long kot long Sisaria na kamapim ol tok bilong kotim em. Tasol ol i no gat evidens olsem Pol i bin mekim rong. Maski i olsem, ol i kalabusim nating Pol inap 2-pela yia. Olsem na Pol i apil long ol i mas harim kot bilong em long Rom, na ol i salim em i go long Rom.​​—Aposel 23:16–​24:27; 25:​8-​12.

Yumi kisim wanem skul long dispela stori long kandere bilong Pol?​​​— Yumi mas i gat strongpela bel na bai yumi inap tokaut long ol samting i stret, na sapos yumi mekim olsem yumi inap seivim laip bilong ol narapela. Maski Jisas i save olsem ol birua “i laik kilim em i dai,” em i wok yet long tokim ol manmeri long Kingdom Bilong God. Jisas i tokim yumi long mekim wankain pasin. Bai yumi mekim olsem? Bai yumi mekim sapos yumi gat strongpela bel wankain olsem bilong kandere bilong Pol.​​—Jon 7:1; 15:13; Matyu 24:14; 28:​18-​20.

Pol i tokim yangpela pren bilong em Timoti olsem: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Tru tumas, kandere bilong Pol i bihainim kain gutpela tok bilong ankol bilong em. Bai yu mekim wankain pasin?

[Futnot]

Ol Askim:

○ Husat sampela wanblut bilong Pol? Yumi kisim wanem save long ol?

○ Kandere bilong Pol i mekim wanem bilong seivim laip bilong Pol?

○ Yumi bihainim tok bilong Jisas, na yumi ken mekim wanem bilong helpim ol manmeri long kisim laip?