Jisas i Givim Laip Bilong Em Bilong Helpim Planti Manmeri
Jisas Krais i bin tokim ol disaipel bilong em olsem em “i no bin i kam [long graun] bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Em i redi long givim laip bilong em bilong helpim ol arapela.
Olsem wanem Jisas i givim pe bilong baim bek ol manmeri long rot bilong indai bilong em? Bilong wanem dispela i bikpela samting? Jisas i givim laip bilong em bilong helpim husat? Na dai bilong em inap helpim yu olsem wanem?
Ol Witnes Bilong Jehova i amamas long singautim yu i kam bung wantaim ol bilong skelim ol bekim bilong Baibel long ol dispela askim. Long dispela yia, de bilong tingim indai bilong Jisas bai i kamap long Tunde, Mas 30, bihain long taim san i go daun pinis. Long dispela taim, bai i gat wanpela tok i kamapim ol bekim bilong Baibel long ol dispela askim i stap antap.
Yu ken go long wanpela Haus Kingdom i stap klostu long hap yu stap long en. Plis askim ol Witnes Bilong Jehova i stap long hap bilong yu long taim na ples stret dispela bung bai kamap long en.