Sindaun Bilong Ol Kristen Bilong Pastaim
Raun Long Olgeta Hap Bilong Graun
“Long de bihain em i go wantaim Barnabas long taun Derbe. Tupela i autim gutnius long Derbe, na tupela i mekim planti manmeri i kamap disaipel. Na bihain tupela i go bek long Listra na Aikoniam na Antiok.”—APOSEL 14:20, 21.
MAN bilong raun i pulim kolpela win bilong moningtaim. Em i subim lek bilong em i go insait long olpela sandel bilong em. Orait nau em i mas wokabaut gen inap wanpela de olgeta.
Long gutpela san bilong moningtaim, em i wokabaut long rot i gat das na em i go abrusim ol gaden wain, ol hap i gat ol diwai oliv, na i go antap long maunten. Taim em i wokabaut em i bungim ol narapela man bilong raun—ol fama i go long gaden, ol man bilong wok bisnis i wokabaut wantaim ol animal i karim kago bilong ol, na ol manmeri i laik go long Jerusalem bilong lotu. Man bilong raun na ol poroman bilong em, ol i toktok wantaim olgeta man ol i bungim. Bilong wanem ol i mekim olsem? Ol i laik inapim wok Jisas i bin givim long ol, em wok bilong autim tok bilong em “i go inap long olgeta hap bilong graun.”—Aposel 1:8.
Dispela man bilong raun ating em aposel Pol o Barnabas o wanpela bilong ol strongpela misineri long taim bilong ol aposel. (Aposel 14:19-26; 15:22) Ol i strongpela man, na ol i tingting strong long mekim wok bilong ol. Aposel Pol i stori long ol bagarap i painim em long solwara, na em i tok: “Tripela taim sip mi stap long en, em i bagarap, na wanpela nait na wanpela san mi trip i stap long solwara.” Pasin bilong wokabaut long rot tu em i no isi. Pol i tok, planti taim “mi laik lus long wara, na mi laik bagarap long han bilong ol stilman i save pulim samting bilong ol man i wokabaut long rot.”—2 Korin 11:25-27.
Bai yu pilim olsem wanem taim yu raun wantaim ol dispela misineri? Bai yu raun inap hamas kilomita long wanpela de? Bai yu karim wanem ol samting, na bai yu slip we long taim yu raun?
Raun Long Rot Long taim bilong ol aposel, ol Rom i bin wokim planti rot i joinim ol bikpela taun insait long hap em Rom i bosim. Ol i bin mekim gut ol plen na wokim ol gutpela strongpela rot. Braitpela bilong planti bilong ol dispela rot em inap olsem 4.5 mita, na ol i lainim ol ston long en, na long sait bilong rot ol i wokim ol baret, na ol i sanapim ol pos ston i gat rait long en bilong makim hamas kilomita moa bilong kamap long narapela taun. Long kain rot olsem, wanpela misineri olsem Pol em inap wokabaut olsem 32 kilomita long wanpela de.
Tasol long Palestain planti rot i nogut—ol i ron namel long ol gaden na long arere i gat ol bikpela baret. Ating man bilong raun inap bungim ol wel animal o ol stilman, o rot i pas olgeta.
Man bilong raun bai karim wanem ol samting wantaim em? Sampela samting em bai karim em stik wokabaut bilong lukautim em (1), wanpela matres (2), paus mani (3), sandel (4), beg bilong karim kaikai (5), sampela klos (6), baket ol i wokim long skin bilong animal bilong pulim wara long ol hulwara long rot (7), botol wara (8), na bikpela beg bilong karim ol samting (9).
Ol misineri bai bungim ol bisnisman i raun bilong salim ol samting long ol maket. Ol dispela bisnisman i save karim ol kago bilong ol antap long ol donki. I no gat narapela animal inap wokabaut gut long ol maunten rot olsem ol donki. Ol stori i kamapim olsem ol donki inap karim planti kago na wokabaut inap olsem 80 kilomita long wanpela de. Ol karis em bulmakau i save pulim, ol i save isi isi na ol inap wokabaut inap 8 i go 20 kilomita tasol. Tasol ol bulmakau inap karim planti samting moa na ol i gutpela long ol sotpela raun. Taim man i wokabaut em bai abrusim ol lain kamel o lain donki—em planti animal i karim ol kago i kam long olgeta hap. Wanpela man bilong karim ol pas i raun long hos na em i spit i go; ating em i karim ol pas bilong king i go long wanpela taun i stap longwe.
Long nait, ol man bilong raun i save wokim liklik haus sel arere long rot na slip long en. Ating sampela bai slip long wanpela banis i gat ol rum i raunim ples bung. Ol dispela haus i doti na i no inap lukautim gut ol man long ren win samting na ol stilman. Sapos inap, ol misineri bilong raun i save slip wantaim ol famili o ol wanbilip.—Aposel 17:7; Rom 12:13.
Raun Long Solwara Ol liklik bot i save karim kago na ol man long ol wara klostu long nambis, na i go long hapsait bilong raunwara Galili. (Jon 6:1, 2, 16, 17, 22-24) Planti bikpela sip i save brukim solwara Mediterenian, ol i save karim kago i go i kam long ol taun i stap longwe. Ol dispela sip i save karim ol kaikai samting i go long Rom na bringim ol tok na wokman bilong gavman Rom i go long ol narapela narapela taun.
Ol kepten bilong sip i save lukim ol mak bilong ples long taim bilong san na ol sta long nait bilong stiaim sip. Olsem na gutpela taim bilong raun long sip em long mun Me i go inap long mun Septemba taim i no gat bikpela ren na strongpela win na solwara i slip gut. Planti sip i save bagarap long taim bilong bikpela win na ren.—Aposel 27:39-44; 2 Korin 11:25.
Ol manmeri i no raun long sip, long wanem, dispela i winim raun long rot, nogat. Tasol ol kago sip i nambawan rot bilong ol man long raun long solwara, maski ol i no tingim tumas ol pasindia. Ol man bilong raun i save stap na slip antap long dek, maski i gat ren o win samting. Aninit long dek we hap i drai em ples bilong ol gutpela kago. Ol pasindia i save bringim kaikai bilong ol yet. Na ol lain bilong sip i save givim wara long ol. Bikpela win ren na biksi i sakim sip i go i kam na ol pasindia i save traut, na sampela taim ol i save traut inap sampela de.
Maski i gat hatwok long raun long solwara na graun, ol misineri olsem Pol i bin wok strong long “autim dispela gutnius bilong kingdom” i go long olgeta hap ol i save long en long dispela taim bipo. (Matyu 24:14) Inap olsem 30 yia bihain long taim Jisas i tokim ol disaipel long autim tok bilong em, Pol inap tok olsem ol i bin autim gutnius “long olgeta manmeri i stap long graun.”—Kolosi 1:23.