Gaden Iden—Yu Ting Em Ples Bilong Ol Man Long Pastaim Tru?
PIKSAIM long tingting olsem yu stap long wanpela gutpela gaden. I no gat ol samting bilong pulim nabaut tingting bilong yu, na i no gat nois bilong ol ka na masin samting bilong biktaun. Dispela gaden i bikpela tru, na i no gat wanpela samting i bagarapim bel isi bilong en. Na gutpela samting moa, bel na tingting bilong yu i stap isi, na bodi bilong yu i strong, na i no gat sik na pen samting. Yu amamas tru long lukim ol gutpela samting.
Yu lukim ol gutpela kala bilong ol plaua, klinpela wara i lait gut taim san i kisim, na ol lip bilong ol diwai na gras samting i grin tru. Yu pilim gutpela win long skin bilong yu, na tu, yu pulim gutpela smel bilong ol plaua samting. Yu harim nois bilong ol lip i meknais, wara i kalap long ol ston, krai bilong ol pisin, na singaut bilong ol binatang i mekim wok. Taim yu piksaim ol dispela gutpela samting, ating bai yu gat laik tru long stap long dispela ples, a?
Ol manmeri long olgeta hap i bilip olsem namba wan man na meri i bin stap long kain ples olsem. Inap planti handet yia, ol i bin skulim ol lain bilong lotu Juda, lotu Kristen, na lotu Islam long gaden Iden, we God i bin putim Adam na Iv i stap long en. Baibel i tok, ol i bin stap bel isi na amamas. Ol yet i stap wanbel, na bel isi wantaim ol animal na wantaim God husat i bin givim rot long ol bilong i stap oltaim long dispela gutpela ples tru.—Stat 2:15-24.
Ol Hindu tu i bilip long wanpela paradais i bin stap long bipo tru. Ol lain bilong lotu Buda i bilip olsem ol bikman bilong lotu, olsem ol Buda, ol i bin kamap long wanpela taim we graun i bin stap olsem wanpela ples paradais. Na planti lotu bilong Afrika i skulim ol man long ol stori i wankain long stori bilong Adam na Iv.
Dispela stori bilong wanpela paradais bilong bipo i bin stap long planti lotu na bilip bilong ol man. Wanpela man bilong raitim buk i tok: “Planti lain man i bilip long wanpela paradais i bin stap long bipo we ol samting i bin stap gutpela tru, ol man i bin stap fri, bel isi, amamas, ol i gat planti gutpela samting, na i no gat ol hevi, bel nogut, na pait. . . . Taim ol man i tingim olsem dispela paradais i lus, ol i no amamas na ol i gat laik tru olsem paradais i mas kamap gen.”
Yu ting olgeta dispela stori na bilip i gat wanpela as tasol? Yu ting samting i bin stap tru i kirapim planti man long kisim dispela bilip? Tru tru long bipo i gat gaden Iden na Adam na Iv?
Ol man i gat tupela tingting ol i tok bilas long dispela bilip. Nau long dispela taim bilong bikpela save bilong saiens, planti i ting kain stori olsem em i stori tumbuna na stori nating tasol. Yumi kirap nogut olsem ol man i gat lotu, ol tu i gat tupela tingting long dispela samting. Planti hetman bilong lotu i kirapim ol man long ol i no ken bilip long gaden Iden. Ol i tok, long bipo i no gat wanpela ples olsem, na dispela stori em i stori nating, stori tumbuna samting, na tok piksa tasol.
Tru tumas, Baibel i gat ol tok piksa. Jisas yet i bin kamapim ol tok piksa em planti man i save long ol. Tasol Baibel i stori long ol samting i bin kamap long gaden Iden olsem samting i bin kamap tru tru, na i no wanpela tok piksa tasol. Sapos ol samting yumi stori long en i no bin kamap tru, orait olsem wanem yumi inap bilip long ol narapela tok bilong Baibel? Orait, yumi ken skelim as na sampela i gat tupela tingting long gaden Iden, na yumi ken save olsem tingting bilong ol i stret o nogat. Bihain long dispela bai yumi kisim save long as na dispela stori i bikpela samting long yumi wan wan.