Yu Save Long Dispela?
Wanem dispela pasin bilong bungim ol hap kaikai i stap long gaden? Dispela pasin i bin helpim husat?
▪ Lo Bilong Moses i bin tambuim ol fama long kisim olgeta liklik hap kaikai i stap long gaden bilong ol. Taim ol i bungim ol rais wit samting long gaden, ol i no ken kisim olgeta kaikai i stap long arere bilong gaden. Ol i no ken kisim ol pikinini bilong wain i stap nabaut, na ol i no ken i go bek na kisim ol prut em pastaim i no bin mau. Na ol man i paitim han bilong ol diwai oliv bilong kisim kaikai bilong en, ol i mas lusim ol oliv i no bin pundaun long graun. (Wok Pris 19:9, 10; Lo 24:19-21) Ol rabisman, ol pikinini i no gat papamama, ol meri man bilong ol i dai pinis, na ol narapela lain i sindaun namel long ol, ol inap bungim ol hap kaikai i stap yet long gaden.
Dispela lo i bin helpim lain Israel olgeta. Em i bin kirapim ol papagraun long kisim pasin bilong givim ol samting, tingim ol narapela man, na wetim God i mekim gut long ol. Na ol manmeri i save bungim ol hap kaikai ol i mas wok strong, long wanem, em wanpela wok i gat hatwok bilong en. (Rut 2:2-17) Dispela pasin i mekim na ol rabisman i no ken hangre o ol i putim hevi long ol narapela i mas lukautim ol. Na tu, ol i no gat wok long singaut long kisim nating kaikai o wet long ol narapela i givim kaikai long ol.
Bilong wanem Solomon i kisim ol diwai long Lebanon bilong wokim tempel long Jerusalem?
▪ Namba 1 King 5:1-10 i stori long kontrak em Solomon i bin wokim wantaim Hiram, king bilong Tair. Kontrak i tok ol i mas katim ol diwai sida long Lebanon na pasim wantaim na putim long solwara na bringim i kam long Israel bilong wokim tempel.
Long hap bilong Midel Is long bipo, ol diwai sida i bikpela samting ol man i bin mekim wok bisnis long en. Long Isip na Mesopotemia, ol i bin kisim dispela kain diwai bilong wokim ol sparen na ol gutpela banis insait long ol tempel na long ol haus king. Ol rait i bin stap long bukrum bilong ol king na sampela narapela rait i soim olsem ol i save bringim ol diwai sida i kam long ol biktaun bilong Mesopotemia long hap saut. Sampela taim ol i bin kisim ol dispela diwai long rot bilong pait o ol i salim i kam olsem takis. Long Isip ol i mekim wok long ol diwai sida bilong wokim ol samting bilong ol king, olsem ol sip, ol kofin, na ol kain samting olsem.
Ol plang ol i katim long diwai sida bilong Lebanon i gat nem long i stap longpela taim, ol i naispela tru, i gat gutpela smel, na ol binatang i no inap bagarapim. Olsem na Solomon i bin kisim ol nambawan diwai tru bilong wokim tempel. Long bipo ol dispela diwai sida i pulap tru long ol maunten bilong Lebanon, tasol long nau ol i stap long wan wan liklik hap tasol.
[Piksa long pes 15]
Piksa long haus King bilong Sargon long Asiria i soim ol sip i karim ol diwai Sida bilong Lebanon
[Credit Line]
Erich Lessing/Art Resource, NY