Wanpela Tok Profet i Gat Bikpela Mining

“Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”​—MATYU 24:⁠14.

OL SAVEMAN i wanbel olsem dispela ves em i bikpela samting tru. Em i bikpela samting, long wanem, wok em dispela ves i stori long en bai kamap long olgeta hap bilong graun, na em wanpela wok ol Kristen i mas mekim. Dispela wok bai tokaut long “pinis” em Jisas i bin toktok long en, na bai kamap paslain long dispela “pinis.”

Dispela tok profet i wok long kamap tru long nau. Yu tu yu mas save long dispela tok profet, long wanem, gutnius i stap long en i gat wanpela singaut na wanpela tok lukaut. Em i givim rot long yu long makim wanem samting yu bai mekim: Yu bai orait long Kingdom Bilong God o yu bai sakim. Disisen bilong yu bai mekim sampela samting long i stap bilong yu.

Orait, skelim ol arapela ves i stap klostu long dispela ves. Sampela de paslain long ol i nilim Jisas long diwai, ol disaipel bilong em i kam na askim em long ol samting bai kamap bihain. Ol i gat laik long save long wanem taim Kingdom Bilong God bai kamap, em samting planti taim Jisas i bin toktok long en. Na tu, ol i laik save long wanem taim bai “pinis bilong dispela taim i kamap,” o olsem sampela Baibel i tanim dispela tok olsem “dispela graun i laik pinis.”​—⁠Matyu 24:​3, BB.

Jisas i bekim askim bilong ol na i tok profet olsem bai i gat ol bikpela pait, hangre, sik, na ol bikpela guria. Em i tok tu olsem planti manmeri tru bai sakim lo, ol bikman bilong ol lotu bai giamanim planti manmeri, na ol man bai heitim na mekim nogut long ol Kristen tru. Olgeta dispela samting em ol nius nogut.​—⁠Matyu 24:​4-13; Luk 21:⁠11.

Tasol i gat gutnius tu. Inap planti handet yia pinis, ol tok Jisas i kolim antap i bin kirapim tru tingting bilong ol man na ol i luksave olsem gutpela samting bai kamap bihain. Ol manmeri i wanbel olsem dispela tok bilong Jisas em i bikpela samting, tasol ol i no wanbel long mining bilong en. Dispela gutnius em i wanem samting stret? Kingdom em i wanem samting? Dispela tok profet bai kamap tru long wanem taim? Husat bai truim dispela tok profet? Na “pinis” i makim wanem samting? Orait nau yumi ken skelim ol dispela askim.

[Piksa long pes 2, 3]

Kopi bilong Washington Manuskrip bilong Fopela Gutnius. Matyu 24:14 i stap long blakpela rait

[Kredit Lain]

From the book Facsimile of the Washington Manuscript of the Four Gospels in the Freer Collection 1912