Kisim Skul Long Tok Bilong God
Bilong Wanem God i Larim Pasin Nogut na Pen na Hevi i Stap?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. Pasin nogut i kirap olsem wanem?
Pasin nogut i kirap long graun taim Satan i mekim namba wan tok giaman. Satan em i no man nogut taim God i wokim em. Em i wanpela gutpela ensel, tasol “em i no holimpas tok i tru.” (Jon 8:44) Em i kisim laik olsem ol narapela i mas lotuim em, em samting God tasol i mas kisim. Satan i bin giamanim namba wan meri, Iv, na i grisim em long bihainim tok bilong em na sakim tok bilong God. Adam i bihainim Iv na sakim tok bilong God. Disisen bilong Adam i kamapim pen na hevi na indai.—Ritim Stat 3:1-6, 17-19.
Taim Satan i pulim Iv long sakim tok bilong God, em i kirapim pasin bilong bikhet long wok bos bilong God. Klostu olgeta manmeri i bihainim Satan na ol i sakim tok bilong God. Olsem na Satan i kamap “hetman bilong dispela graun.”—Ritim Jon 14:30; Revelesen 12:9.
2. Yu ting ol samting God i wokim i no gutpela tumas?
Ol manmeri na ol ensel em God i bin wokim, ol inap tru long bihainim ol lo bilong God. (Lo 32:5) God i wokim yumi bilong i stap fri long makim olsem yumi laik mekim gutpela pasin o pasin nogut. Dispela pasin bilong stap fri i givim rot long yumi long kamapim klia olsem yumi laikim tru God.—Ritim Jems 1:13-15; 1 Jon 5:3.
3. Bilong wanem God i larim pen na hevi i stap?
Inap sampela haptaim, God i larim ol man i bikhet long wok bos bilong em. Bilong wanem em i mekim olsem? Bilong soim olsem taim ol man i bosim wokabaut bilong ol yet, dispela i no inap helpim ol. (Jeremaia 10:23) Insait long 6,000 yia i go pinis, i stap bilong ol man i kamapim klia olsem God i mas bosim ol. Ol bikman bilong gavman i no inap pinisim woa, pasin raskol, pasin i no stret, na sik.—Ritim Saveman 7:29; 8:9; Rom 9:17.
Tasol ol manmeri i aninit long wok bos bilong God, ol bai stap gut. (Aisaia 48:17, 18) Klostu nau Jehova bai pinisim olgeta gavman bilong graun. Ol manmeri i stap aninit long wok bos bilong God, ol bai kisim graun na stap long en.—Aisaia 2:3, 4; 11:9; ritim Daniel 2:44.
4. Pasin bilong God long wet i opim wanem rot long ol man?
Satan i tok i no gat wanpela man bai i stap gut long Jehova. Pasin bilong God long wet i givim rot long yumi olgeta long soim olsem yumi laik daun long wok bos bilong God o long wok bos bilong ol man. Ol samting yumi mekim long i stap bilong yumi i makim yumi daun long wok bos bilong husat.—Ritim Jop 1:8-11; Sindaun 27:11.
5. Olsem wanem yumi makim God olsem Bos bilong yumi?
Yumi makim God olsem Bos bilong yumi taim yumi mekim wok long Baibel bilong helpim yumi long kisim save long lotu i tru na bihainim. (Jon 4:23) Yumi no insait long wok politik na woa, olsem Jisas i bin mekim.—Ritim Jon 17:14.
Satan i mekim wok long strong bilong em bilong kirapim ol man long mekim pasin nogut na ol pasin i save bagarapim ol man. Taim yumi sakim ol dispela pasin nogut, sampela pren na wanblut bilong yumi bai tok bilas o birua long yumi. (1 Pita 4:3, 4) Olsem na yumi mas makim samting yumi laik mekim. Olsem wanem? Bai yumi bung wantaim ol man i laikim tru God? Bai yumi bihainim ol gutpela lo bilong em? Sapos yumi mekim olsem, yumi kamapim klia olsem Satan i giaman taim em i tok i no gat wanpela man bai i stap gut long God.—Ritim 1 Korin 6:9, 10; 15:33.
Bilong kisim sampela save moa, lukim sapta 11 bilong buk Tru Tru Baibel i Tok Wanem? em ol Witnes Bilong Jehova i wokim.
[Piksa Long Pes 16]
Adam i makim rot nogut
[Piksa Long Pes 17]
Ol samting yumi makim bai soim olsem yumi laikim God olsem Bos bilong yumi o nogat