Kisim Skul Long Tok Bilong God

Dispela atikol i kamapim sampela askim ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Bilong wanem yumi mas skelim gut na makim ol pren?

Planti man i laik bai ol narapela i mas laikim ol. Dispela laik i mekim na yumi save bihainim pasin bilong ol lain yumi poromanim. Ol pren bilong yumi i gat strong long stiaim tingting na laik bilong yumi. Olsem na ol inap mekim sampela samting long pasin yumi bihainim.​—⁠Ritim Sindaun 4:23; 13:⁠20.

Man bilong raitim Baibel, Devit, em i bin skelim gut na makim ol pren bilong em. Em i poroman wantaim ol man husat i helpim em long stap gut olsem wokman bilong God. (Song 26:​4, 5, 11, 12) Olsem, Devit i poroman gut wantaim Jonatan, long wanem, Jonatan i strongim em long bilip long Jehova.​—⁠Ritim 1 Samuel 23:​16-18.

2. Olsem wanem yu inap kamap pren bilong God?

Maski Jehova i gat olgeta strong, yumi inap kamap pren bilong em. Olsem, Abraham i bin kamap pren bilong God. Em i bilip tru long Jehova na bihainim tok bilong em, olsem na Jehova i kolim em olsem pren. (Stat 22:​2, 9-12; Jems 2:​21-23) Sapos yumi bilip long Jehova na mekim ol samting em i tokim yumi long mekim, yumi tu inap kamap pren bilong God.​—⁠Ritim Song 15:​1, 2.

3. Ol gutpela pren inap helpim yu olsem wanem?

Ol gutpela pren bai stap gut long yu na helpim yu long bihainim stretpela pasin. (Sindaun 17:17; 18:24) Olsem, krismas bilong Jonatan i winim krismas bilong Devit inap 30 yia samting, na i stret olsem Jonatan bai kamap king bilong Israel. Tasol taim God i makim Devit long kamap king, Jonatan i no lusim Devit, nogat, em i stap gut long Devit na sapotim em. Na tu, ol pren tru bai i tokaut stret long yu sapos ol i lukim olsem yu wok long mekim longlong pasin. (Song 141:⁠5) Ol pren husat i laikim God ol bai helpim yu long kamapim ol gutpela pasin.​—⁠Ritim 1 Korin 15:⁠33.

Sapos yu save laikim stretpela pasin na yu laik bungim ol manmeri i gat wankain tingting olsem yu, yu inap painim ol long Haus Kingdom bilong ol Witnes Bilong Jehova. Long dispela hap bai yu kisim ol pren husat bai strongim yu long mekim ol pasin em God i amamas long en.​—⁠Ritim Hibru 10:​24, 25.

Tasol maski ol pren bilong yumi i laikim God, sampela taim ol inap mekim yumi bel hevi. No ken bel hevi hariap long ol popaia bilong ol. (Saveman 7:​9, 20-22) Tingim, i no gat wanpela pren i gutpela olgeta, na ol pren i laikim God ol i olsem gutpela samting i dia tru long yumi. Tok Bilong God i kirapim yumi long lusim rong bilong ol wanlain Kristen.​—⁠Ritim Kolosi 3:⁠13.

4. Olsem wanem sapos ol pren i birua long yu?

Planti manmeri i luksave olsem taim ol i wok long kisim helpim long kliagut long Tok Bilong God, sampela olpela pren bilong ol i save birua long ol. Ating ol dispela kain pren i no kliagut long ol gutpela skultok na gutpela tok promis yu kisim save long en long Baibel. Olsem na ating yu inap helpim ol.​—⁠Ritim Kolosi 4:⁠6.

Sampela taim, “ol pren” bilong yu bai tok bilas long gutnius i stap long Baibel. (2 Pita 3:​3, 4) Ating sampela bai tok bilas long yu taim yu bihainim stretpela pasin. (1 Pita 4:⁠4) Sapos dispela samting i painim yu, orait yu mas makim olsem yu bai stap pren bilong ol, o stap pren bilong God. Sapos yu makim olsem yu bai stap pren bilong God, orait yu makim pren i nambawan tru winim ol narapela.​—⁠Ritim Jems 4:​4, 8.

Bilong kisim sampela save moa, lukim sapta 12 na 19 bilong dispela buk em ol Witnes Bilong Jehova i wokim. Tru Tru Baibel i Tok Wanem?