Ol Stori Tru, i No Stori Nating

“Mi bin mekim gut wok painimaut long ol samting i bin kamap kirap long pastaim.”—LUK 1:3.

OLSEM WANEM BAIBEL I NARAPELA KAIN? Ol stori tumbuna na stori nating i kamapim ol kain kain stori we i no kolim stret ples, taim, na nem bilong ol man. Tasol Baibel i stori long planti samting i kamapim ples klia olsem olgeta tok bilong en i “tok tru tasol.”—Song 119:160.

EKSAMPEL: Baibel i tok: ‘King Nebukatnesar bilong Babilon i kalabusim pinis Jehoiakin king bilong Juda na bringim em i go long Babilon.’ Bihain “Evil Merodak i kamap king bilong Babilon. Na long . . . dispela yia, Evil Merodak i sori long Jehoiakin na i pinisim kalabus bilong en.” Na tu, “king bilong Babilon i tok, na olgeta de ol i givim mani samting long Jehoiakin, bilong Jehoiakin i ken i stap gut. Na ol i mekim olsem i go inap long taim Jehoiakin i dai.”—2 King 24:11, 15; 25:27-30.

SAMTING OL SAVEMAN I PAINIM: Namel long ol hip pipia bilong taun Babilon bilong bipo, ol saveman i painim sampela rait bilong wok gavman em bilong taim bilong Nebukatnesar Namba 2. Ol dispela rait i gat lista bilong kaikai ol i save givim long ol kalabusman na ol narapela lain bilong haus king. Lista i kolim tu nem bilong “Yaukin [Jehoiakin],” em “king bilong kantri Yahud (Juda),” na ol wanhaus bilong em. Olsem wanem long wok king bilong Evil Merodak, em man i kisim ples bilong Nebukatnesar? Wanpela botol bilong holim plaua em ol i painim klostu long taun Susa i gat rait olsem: “Haus king bilong Amil-Marduk [Evil-merodak], King Bilong Babilon, pikinini man bilong Nebukatnesar, King Bilong Babilon.”

YU GAT WANEM TINGTING? Yu ting i gat sampela narapela olpela rait bilong lotu i kolim stret ol samting i bin kamap bipo na ol tok bilong en i tru? O yu ting Baibel i narapela kain?

[Rait long pes 5]

“Stori bilong en long ol det na ol ples ol samting i kamap long en i stret moa na man inap bilip tru long en, winim ol narapela rait bilong bipo.”—A SCIENTIFIC INVESTIGATION OF THE OLD TESTAMENT, BY ROBERT D. WILSON

[Piksa long pes 5]

RAIT BILONG BABILON I KOLIM KING JEHOIAKIN BILONG JUDA

[Piksa Kredit Lain long pes 5]