Askim 3: Bilong Wanem God i Larim Mi Karim Pen na Hevi?

PAPA bilong Ian em wanpela man bilong dring planti. Maski Ian i gat olgeta samting em i nidim, em i pilim olsem papa i no tingim em na laikim em. Em i tok: “Mi no save laikim tumas papa bilong mi, long wanem, em i save dring planti, na tu, long pasin em i save mekim long mama.” Taim Ian i kamap bikpela man, em i tingting planti olsem tru God i stap o nogat. Em i tok: “‘Sapos tru God i stap, orait bilong wanem em i larim ol man i karim pen na hevi.’”

Bilong wanem ol man i mekim dispela askim?

Maski i no gat hevi long laip bilong yu, ating bel bilong yu bai bagarap stret taim yu lukim ol man i no gat asua i karim pen na hevi. Dispela askim long wai na pen na hevi i stap bai bikpela samting long yu sapos yu yet, olsem Ian, i karim hevi o wanpela wanfamili bilong yu i sik o dai.

Sampela i givim wanem bekim?

Sampela man i ting God i larim pen na hevi i stap bilong skulim yumi long kisim pasin daun na pasin sori. Ol narapela i ting olsem ol manmeri i karim pen na hevi nau long ol rong ol i bin mekim bipo.

Ol dispela bekim i kamapim klia wanem kain tingting?

God i no save sori long ol man i karim pen na hevi, dispela i mekim na i hatwok long laikim em. God em i man nogut.

Baibel i tok wanem?

Baibel i kamapim klia olsem i no asua bilong God na ol pen na hevi i painim ol man. Baibel i tok: “Taim traim i painim wanpela man, em i no ken tok: ‘God i traim mi.’ Ol samting nogut i no inap traim God, na tu, God i no save traim man.” (Jems 1:13) Dispela tingting olsem God i gat asua long pen na hevi i painim ol man, dispela i no stret liklik wantaim ol pasin bilong God em Baibel i stori long en.

Wanpela bikpela pasin bilong God em pasin laikim. (1 Jon 4:8) Bilong strongim dispela poin, Baibel i stori long God i gat ol filings wankain olsem bilong wanpela mama i gat bebi. God i askim: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a? Ating wanpela mama inap mekim olsem, tasol mi no inap tru lusim tingting long yupela. Nogat tru.” (Aisaia 49:15) Yu inap piksaim long tingting wanpela gutpela mama i mekim nogut long pikinini bilong em? Nogat, gutpela papa o mama bai traim long daunim pen na hevi bilong pikinini bilong em. Olsem tasol, God i no save givim pen na hevi long ol man i no gat asua.—Stat 18:25.

Maski i olsem, ol man i no gat asua i save karim pen na hevi. Ating bai yu tingting, ‘Sapos God i tingim tru yumi na em i gat olgeta strong, bilong wanem em i no pinisim ol samting i save kamapim pen na hevi?’

I gat as na God i larim ol pen na hevi i stap yet long taim bilong yumi. Wanpela as em olsem: Planti taim ol manmeri yet i save givim pen na hevi long ol narapela. Planti bikhetman na ol man nogut em ol i save givim pen long ol narapela, ol i no laik senisim pasin bilong ol. Olsem na God bai bagarapim ol kain man olsem em ol i stap olsem as tru bilong ol pen na hevi.

Aposel Pita i stori long as na God i no bagarapim ol man nogut, em i tok: “Jehova i no save wok isi isi long truim tok promis bilong em, olsem sampela man i save tok. Nogat. Tasol em i wetim yupela na i no les kwik, long wanem, em i no laik bai wanpela i kisim bagarap. Em i laik bai olgeta i tanim bel.” (2 Pita 3:9) God Jehova i no les kwik na dispela i soim pasin laikim na pasin marimari bilong em.

Klostu nau, God Jehova bai mekim sampela samting. Em bai “bekim pen na hevi long ol man husat i givim pen na hevi” long ol man i no gat asua. Ol man husat i givim hevi nating long ol narapela, ol bai “kisim strafe long kot na bagarap inap oltaim.”—2 Tesalonaika 1:6-9.

Ian, em yumi stori pinis long em long kirap bilong dispela atikol, em i kisim ol gutpela bekim long ol askim em i gat long pen na hevi. Ol skul em i kisim i senisim tru tingting bilong em. Ritim stori bilong em i stap long pes 13 bilong dispela nius.