Samting Ol i “No Inap Lusim Tingting Long En” i Kamap Long Taim Stret

“MI NO inap lusim tingting long en!” Planti man i bin mekim dispela tok taim ol i lukim piksa bilong taim God i bin wokim olgeta samting, nem bilong en “Creation Drama.” Dispela piksa i bin kamap long taim stret, na ol man i lukim ol i no inap lusim tingting long en. Tru tumas, dispela piksa i kirapim planti man long givim biknem long Jehova klostu long taim gavman bilong Hitler i kirap mekim nogut long lain bilong Jehova long Yurop. Tasol “Creation Drama” em i wanem kain piksa?

Long 1914, hetkota bilong lain bilong Jehova long Brooklyn, New York, Amerika, i kamapim “Photo-Drama of Creation.” Dispela em i wanpela muvi i longpela inap 8-pela aua, na em i gat ol kala kala piksa slait, na saun. Planti milion manmeri long olgeta hap ol i lukim “Photo-Drama.” Na tu, long 1914 ol i kamapim narapela piksa i sotpela moa, em “Eureka Drama.” Tasol long 1922 samting, ol piksa slait, film, na projekta i kamap olpela na i no wok gut. Tasol planti manmeri i gat laik long lukim gen “Photo-Drama.” Olsem: Ol manmeri bilong Ludwigsburg, Jemani, ol i askim olsem, “Wanem taim bai yupela i soim gen ‘Photo-Drama’?” Orait ol brata bai mekim wanem?

Bilong stretim wok bilong soim Drama long ol man, long 1922 samting lain bilong Betel long Magdeburg, Jemani, i baim sampela film long wanpela stua long Paris, Frans, na ol i baim ol slait long sampela kampani long Leipzig na Dresden. Ol i bungim ol dispela samting wantaim sampela olpela slait bilong “Photo-Drama” em ol i gutpela yet.

Brata Erich Frost husat i gat bikpela save long musik, em i kamapim musik bilong pilaim wantaim ol film na slait. Taim ol i pilaim ol dispela film na slait, ol i ritim sampela tok i kam long buk bilong yumi, buk “Creation.” Olsem na ol i kolim nem bilong dispela nupela piksa olsem “Creation Drama.”

Nupela Drama i longpela inap 8-pela aua wankain olsem “Photo-Drama,” na ol i soim ol wan wan hap bilong en long olgeta wan wan nait. Em i stori gut long haptaim we God i bin wokim olgeta samting, na i skelim ol samting i kamap bipo olsem Baibel na ol narapela buk bilong bipo i stori long en, na i kamapim tu olsem lotu giaman i no bin helpim ol man. Ol i soim “Creation Drama” long Ostria, Jemani, Laksambek, Swiselan, na ol i soim tu long ol narapela hap ol man i save mekim tok Jeman.

Erich Frost i tok: “Taim mipela i soim Drama long ol man, i gat haptaim bilong malolo, na insait long dispela taim mi kirapim ol wanlain bilong pilaim musik long go long olgeta wan wan man long odiens, na tilim ol buk na buklet bilong yumi long ol. Long dispela rot, mipela i bin tilim planti buk tru winim namba bilong ol buk mipela i tilim long haus bilong ol man.” Johannes Rauthe i bin stretim rot bilong soim Drama long Polan na Sek Ripablik, na em i tingim yet olsem planti manmeri i bin givim atres bambai ol brata i ken i go lukim ol. Olsem na ol brata inap mekim planti gobek.

Long 1930 samting, ol manmeri i pulap tru long ol haus bung ol i soim “Creation Drama” long en, na olgeta manmeri i save stori long ol Witnes Bilong Jehova. I kam inap long 1933, inap olsem 1 milion manmeri i bin lukim dispela piksa em brens ofis bilong yumi long Jemani i stretim rot bilong soim long ol. Käthe Krauss i tok: “Long olgeta 5-pela de, mipela i wokabaut inap 10-pela kilomita bilong i go lukim dispela drama, na narapela 10-pela kilomita bilong kam bek, na mipela i wokabaut insait long ol bikbus na i go antap long ol maunten na i go daun long ol ples daun.” Else Billharz i tok: “‘Creation Drama’ i bin kirapim mi long laikim tumas tok i tru.”

Alfred Almendinger i stori olsem, taim mama bilong em i go lukim Drama, em i “amamas nogut tru, olsem na em i baim wanpela Baibel na em i laik painim dispela tok ‘purgatory’ (olsem klinpaia).” Mama i no inap painim dispela tok long Baibel, olsem na em i lusim lotu bilong em, na em i kisim baptais. Erich Frost i tok: “‘Creation Drama’ i kirapim planti manmeri tru long kam insait long tok i tru.”—3 Jon 1-3.

Taim ol i wok long soim moa yet “Creation Drama” na planti lain moa i lukim, lain Natsi i wok long kamap strong tru long Yurop na kamapim bikpela hevi. Kirap long 1933, gavman i tambuim wok bilong ol Witnes long Jemani. Kirap long dispela taim na i kam inap long taim Wol Woa 2 i pinis long 1945, ol i mekim nogut tru long ol wokman bilong Jehova long Yurop. Erich Frost i stap kalabus inap 8-pela yia. Tasol em i winim kalabus na bihain em i mekim wok long Betel long Wiesbaden, Jemani. I gutpela tru olsem “Creation Drama” i bin kamap long taim stret na i strongim bel bilong planti Kristen em taim nogut tru i painim ol long Wol Woa 2 bilong traim bilip bilong ol!—Histori bilong yumi long Jemani.