YU SAVE LONG DISPELA?
Bilong wanem ol i bin kolim Ninive bilong bipo olsem taun bilong “kilim ol man i dai”?
Piksa long banis i makim ol soldia i karim het bilong ol birua na hipim ol
Ninive em i nambawan biktaun bilong Gavman Asiria. Em i strongpela taun i gat ol naispela haus king na tempel, na ol gutpela rot i op tru, na ol traipela banis i raunim taun. Profet Nahum i bin kolim olsem taun bilong “kilim ol man i dai.”—Nahum 3:1.
Dispela nem i stret tru long Ninive, long wanem, ol piksa ol i bin droim long haus king bilong Senakerip long Ninive i kamapim klia pasin nogut tru bilong ol Asiria. Wanpela piksa i makim man i kamautim tang bilong wanpela kalabusman em ol i bin sutim em i go pas long graun. Ol rait i tok hambak long ol i bin putim ol huk long nus o maus bilong ol kalabusman na pasim rop long en na pulim ol i go. Na ol ofisa em ol i stap long kalabus, ol Asiria i pasim het bilong sampela king bilong ol dispela ofisa long nek bilong ol, olsem nekles.
Saveman bilong ol samting bilong Asiria, em Archibald Henry Sayce, em i stori long ol samting nogut tru ol Asiria i bin mekim long taim ol i pait na kisim wanpela taun: ‘Taim ol i winim pait, ol i save hipim het bilong ol man long rot olsem mak bilong ol i winim pait; ol i kukim ol pikinini man na meri long paia taim ol i stap laip yet o mekim pasin long ol i nogut moa; ol i pasim ol man long ol pos i gat sap, tekewe skin bilong ol, bagarapim ai, tekewe han, lek, yau o nus bilong ol.’
Bilong wanem ol Juda i wokim ol liklik banis i raunim arere bilong rup bilong haus?
God i bin tokim ol Juda: “Taim yupela i wokim nupela haus, orait yupela i mas wokim wanpela liklik banis long arere bilong rup. Olsem na sapos wanpela man i . . . pundaun long graun na i dai bai yupela i no gat asua.” (Lo 22:8) Em i bikpela samting long ol i mas mekim banis, long wanem, long taim bilong ol man i bin raitim Baibel ol famili Juda i save mekim kain kain samting antap long rup bilong haus.
Haus bilong planti Israel em rup bilong en i flet. Em i gutpela ples bilong ol famili i ken sindaun long san, kisim gutpela win, o mekim sampela wok. Long taim bilong san, em i gutpela ples bilong slip. (1 Samuel 9:26) Ol fama i save mekim drai wit samting long rup, o mekim drai ol fik na greip.—Josua 2:6.
Na ol i save mekim lotu tu antap long rup, lotu i tru o lotu giaman. (Nehemia 8:16-18; Jeremaia 19:13) Aposel Pita i bin go antap long rup bilong haus long belo na em i beten. (Aposel 10:9-16) Na sapos ol rop bilong greip o diwai pam i go antap long rup, ating rup bai i kol long taim bilong san.
Wanpela buk The Land and the Book i tok, long haus bilong ol Israel i gat wanpela leta i go antap long rup, ‘leta i stap ausait long haus tasol em i insait long banis.’ Olsem na man bilong haus em inap lusim rup na kam daun na em i no gat wok long go insait long haus. Dispela i helpim yumi long save long tok lukaut bilong Jisas long man i mas ranawe hariap na lusim taun i laik bagarap. Em i tok: “Man i stap long rup bilong haus, em i no ken kam daun long kisim ol kago i stap insait long haus.”—Matyu 24:17.