BEKIM OL ASKIM BILONG BAIBEL

Tru tru Baibel em i Tok Bilong God?

Yu inap tingim olsem Tok Bilong God i mas narapela kain tru, na Baibel em i kain olsem. Ol i bin prinim planti bilion Baibel long planti handret tokples. Savetingting i stap long Baibel i gat strong long senisim pasin bilong ol man na mekim sindaun bilong ol i gutpela.—Ritim 1 Tesalonaika 2:13; 2 Timoti 3:16.

Yumi save Baibel i kam long God bikos em i tokaut stret long ol samting bai kamap bihain. I no gat man inap mekim olsem long tingting bilong em yet. Olsem, tingim Buk Aisaia. Ol i bin painim wanpela kopi bilong en long wanpela keiv klostu long raunwara Detsi, em ol i bin raitim winim wan handret yia paslain long Jisas i bon. Dispela rait i tok i no gat wanpela man bai sindaun gen long taun Babilon. Fes truim bilong en i kamap planti yia bihain long Jisas i mekim wok autim tok bilong em long graun.—Ritim Aisaia 13:19, 20; 2 Pita 1:20, 21.

Ol i raitim Baibel olsem wanem?

Ol i raitim Baibel insait long 1,600 yia. I gat 40 man i bin raitim Baibel na ol i stori long wanpela as tok na ol tok bilong ol i no pait wantaim. Hau na ol i mekim olsem? God i bin stiaim ol long raitim ol tok.—Ritim 2 Samuel 23:2.

Sampela taim God i toktok long ol man bilong raitim Baibel long rot bilong ol ensel, ol visen, na ol driman. Planti taim, God i putim aidia bilong em long tingting bilong man bilong raitim Baibel, na larim man yet i makim ol tok em bai yusim bilong kamapim ol tok bilong God.—Ritim Revelesen 1:1; 21:3-5.