BEKIM OL ASKIM BILONG BAIBEL

Wanpela gavman bai bosim graun olgeta?

Olsem wanem? I gat wanpela gavman inap helpim ol man? Long nau planti man i bel hevi, long wanem, ol i sot long mani samting tasol ol arapela i gat planti mani kago. Olsem na i mas i gat wanpela gavman i bosim graun olgeta na bai em inap long givim olgeta samting ol man i nidim. Yu ting ol man inap kamapim kain gavman olsem?—Ritim Jeremaia 10:23.

Long bipo yet, ol gavman i no mekim gut wok bilong ol long bosim ol manmeri, moa yet ol manmeri i sot long ol samting. Na sampela gavman i mekim hatpela wok bos. (Saveman 4:1; 8:9) Tasol God i Gat Olgeta Strong i promis long kamapim wanpela gavman we bai i senisim ol gavman bilong nau. Na Hetman bilong en bai lukautim gut ol manmeri.—Ritim Aisaia 11:4; Daniel 2:44.

Kingdom Bilong God bai mekim wanem?

God Jehova i makim gutpela Hetman bilong bosim graun olgeta. Dispela man em Pikinini bilong em, Jisas. (Luk 1:31-33) Taim Jisas i stap long graun, em i amamas long helpim ol man. Olsem King, em bai mekim ol manmeri bilong olgeta kantri i stap wanbel, na em bai pinisim ol pen na hevi.—Ritim Song 72:8, 12-14.

Yu ting olgeta man bai amamas long Jisas i stap olsem Hetman? Nogat, tasol Jehova i gat pasin bilong isi long ol man. (2 Pita 3:9) Em i larim sampela haptaim i lus na bai ol man inap long save olsem i stret Jisas i stap Hetman. Klostu nau Jisas bai bagarapim ol man nogut na ol gutpela man bai i stap bel isi aninit long wok gavman bilong em.—Ritim Maika 4:3, 4.