Gutpela Samting i Wetim Ol Man i Dai Pinis—Yu Bilipim Dispela Tok?

Yu ting dispela tok olsem ol man bai kirap bek em wanpela stori nating? Nogat, aposel Pol i tok: “Sapos long dispela laip tasol yumi bilip long Krais, orait yumi stap tarangu lain stret. Tasol God i bin kirapim bek Krais long dai. Em i kirap bek paslain long ol arapela man i dai pinis, olsem namba 1 kaikai i redi long gaden.” (1 Korin 15:19, 20) Pol i bilip olsem ol man bai kirap bek. Kirap bek bilong Jisas i strongim dispela bilip bilong em.a (Aposel 17:31) Olsem na Pol i kolim Jisas olsem “namba 1 kaikai,” long wanem, em i fes man long kirap bek na kisim laip oltaim. Sapos Jisas i kirap bek, dispela i makim olsem ol narapela tu bai kirap bek.

I gat narapela risen na yumi ken bilip long kirap bek. Jehova em God bilong tok tru. Baibel i tok: “God . . . i no inap giaman.” (Taitus 1:2) Oltaim Jehova i save tok tru tasol, i nogat wanpela taim em i bin tok giaman. Tingim, God i bin kirapim bek ol man long bipo. Olsem na yu ting Em bai no inap long truim tok promis bilong em long kirapim bek ol man i dai pinis? Nogat tru, long wanem, God i no inap long giaman!

Jehova i stretim rot long ol man i ken kirap bek, long wanem, em i gat pasin laikim. Jop i tok: “Ol manmeri i dai pinis, ating ol i no inap kisim laip gen. . . . Long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.” (Jop 14:13-15) Jop i bilip olsem Papa bilong em long heven i laik tru long kirapim em bek. Yu ting God i senisim tingting bilong em? Nogat. God i tok: “Mi tasol mi Bikpela na mi no save senisim tingting bilong mi.” (Malakai 3:6) Ol papamama i gat laik tru long lukim pikinini bilong ol i dai pinis i kirap bek, na God tu i laik tru long lukim ol man i dai pinis i kirap bek, kisim gutpela helt, na stap amamas. Tasol God i gat strong long kirapim bek ol man, na ol papamama nogat.—Song 135:6.

Jehova bai givim strong long Pikinini bilong em long kirapim bek ol man i dai pinis, na ol man i krai sori bai amamas long lukim ol gen. Jisas i gat wanem tingting long kirap bek? Paslain long Jisas i kirapim bek Lasarus, em i luksave olsem ol susa na pren bilong Lasarus i bel hevi, olsem na “aiwara bilong Jisas i pundaun.” (Jon 11:35) Long narapela taim, Jisas i bungim wanpela wido meri bilong Nain em pikinini man bilong em i dai. Jisas “i sori tru long em na tokim em: ‘No ken krai moa.’” Na kwiktaim em i kirapim bek pikinini man bilong dispela meri. (Luk 7:13) Dispela i soim olsem Jisas i pilim hevi bilong ol man i krai sori taim wanpela ol i laikim i dai. Na em bai amamas tru long lukim olsem ol man long graun olgeta bai stap amamas long taim ol man i kirap bek!

Olsem wanem? I gat wanpela taim yu bel hevi tru? Ating yu pilim olsem i nogat rot bilong pinisim dai. Tasol long rot bilong Jisas, God bai kirapim bek ol man i dai pinis. Tingim, God i laik bai yu lukim truim bilong dispela tok promis, na em i laik bai yu amamas long bungim gen ol man yu laikim i kirap bek. Tingim ol samting yupela bai mekim wantaim long bihain inap oltaim oltaim!

Lionel em yumi bin stori pinis long en i tok: “Nau mi save olsem ol man bai kirap bek. Pastaim mi hatwok long bilip long man i autim tok long mi na ol samting em i stori long en. Tasol long rot bilong Baibel, mi luksave olsem dispela tok i tru! Mi laik tru long lukim tumbuna papa bilong mi taim em i kirap bek.”

Yu laik kisim sampela save moa? Ol Witnes Bilong Jehova bai amamas tru long soim yu long Baibel bilong yu yet long as na ol i bilip olsem ol man i dai pinis bai kirap bek long bihain.b