Husat i As Bilong Ol Pen na Hevi?

Sapos ol pen na hevi i no kam long God, orait husat i as bilong ol bikpela hangre, woa, disasta, stap rabis, na ol sik i bagarapim tru ol man? Baibel i kamapim 3-pela bikpela risen na ol man i karim ol pen na hevi:

1. Tingim Ol Yet, Gridi, na Heitim Narapela. “Sampela bikman i wok long daunim ol arapela manmeri na mekim nogut long ol.” (Saveman 8:9) Planti taim ol manmeri i karim ol pen na hevi bikos long pasin bilong ol sinman, ol man i tingim ol yet, na ol man nogut.

2. Taim Nogut i Save Painim Yumi Olgeta. Planti taim ol manmeri i karim ol pen na hevi, long wanem, “taim nogut i save painim yumi olgeta.” (Saveman 9:11) Ol manmeri i stap long rong hap na long rong taim, ol eksiden i kamap, na ol manmeri i no bihainim savetingting o ol i popaia.

3. King Nogut i Bosim Graun. Baibel i kamapim klia namba 1 as na ol man i karim ol pen na hevi. Em i tok: “Dispela graun olgeta i stap long han bilong Satan.” (1 Jon 5:19) “Satan” em wanpela strongpela spirit i bin stap olsem wanpela ensel bilong God, tasol “em i no holimpas tok i tru.” (Jon 8:44) Ol narapela ensel i joinim Satan na bikhet long God bilong inapim laik bilong ol, na ol yet i kamap ol ensel nogut. (Stat 6:1-5) Kirap long taim Satan na ol ensel i bikhet, ol i strong long stiaim ol man long mekim ol pasin nogut long olgeta hap bilong graun. Dispela tok i kamap tru long taim bilong yumi. Nau Satan i belhat nogut tru na em i “giamanim olgeta manmeri bilong graun,” olsem na “yu graun” yu mas lukaut. (Revelesen 12:9, 12) Satan em bos nogut i gat hatpela pasin. Em i amamas taim ol man i karim ol pen na hevi. Satan i as bilong ol pen na hevi ol man i karim, na i no God.

TINGIM: Man i no gat pasin laikim bai givim ol pen na hevi long ol man i no gat asua. Tasol Baibel i tok: “God em i pasin laikim.” (1 Jon 4:8) Olsem na God i gat pasin laikim, em “God I Gat Olgeta Strong i no inap mekim pasin nogut. Nogat tru.”—Jop 34:10.

Ating yu laik save, ‘God i Gat Olgeta Strong bai larim Satan i mekim wok bos nogut bilong em i go inap wanem taim?’ Olsem yumi stori pinis, God i heitim pasin nogut, na em i bel hevi tru taim em i lukim yumi karim ol pen na hevi. Baibel i tok: “God i save wari long yupela, olsem na yupela i mas putim olgeta hevi bilong yupela long han bilong em.” (1 Pita 5:7) God i laikim yumi na em i gat strong long pinisim olgeta pen na hevi na pasin i no stret. Neks atikol bai stori long dispela.a