Yu Save LONG TAIM?
SAPOS yu laik save long taim, yu save mekim wanem? Ating yu lukluk long hanwas bilong yu o long klok. Sapos pren bilong yu i askim long taim, yu bai kolim taim olsem wanem? I gat planti wei bilong kolim taim. Hau bai yu kolim taim?
Orait yumi ken tok olsem taim em 1 aua na 30 minit bihain long belo. Ating yu bai tok 1:30, o ating yu bai bihainim pasin bilong ples yu stap long en na kolim taim olsem 13:30. Dispela em pasin bilong kolim 24 aua taim long hanwas o long klok. Tasol i gat sampela ples em ol inap kolim dispela taim olsem “hap tu.” Dispela i makim olsem 30 moa minit i go painim 2 klok.
Olsem man o meri bilong ritim Baibel, ating yu laik save long hau ol man long taim bilong Baibel i save kolim taim. I gat planti rot bilong kolim taim. Ol Hibru Skripsa i kolim taim olsem “moningtaim,” “belo,” na “apinun tru.” (Stt. 8:11; 19:27; 43:16; 1 Kin. 18:26) Tasol sampela taim Baibel i kolim taim stret.
Planti handret yia paslain long Jisas i bon, lain Israel i divaidim nait i go long 3-pela hap. Long taim bilong Jisas, lain Juda i bihainim pasin bilong ol Grik na Rom long divaidim nait i go long 4-pela hap.
Ol Gutnius i kolim ol dispela hap bilong nait inap planti taim. Olsem, “long namba 4 hap bilong nait,” Jisas i wokabaut antap long wara na i go long bot em ol disaipel bilong em i stap long en. (Mat. 14:25) Long tok piksa, Jisas i tok: “Sapos papa bilong haus i bin save long wanem taim long nait stilman bai kam, orait bai em i was i stap na i no larim stilman i brukim haus bilong en.”—Mat. 24:43.
Jisas i tok long 4-pela hap bilong nait taim em i tokim ol disaipel olsem: “Yupela i mas was i stap, long wanem, yupela i no save long wanem taim Papa bilong haus bai i kam. Bai em i kam taim san i go daun pinis o long biknait o taim kakaruk i krai o long bikmoning, em yupela i no save.” (Mak 13:35) Namba 1 haptaim bilong was em “taim san i go daun pinis.” Dispela taim i kirap long taim san i go daun i go inap long 9 klok long nait. Namba 2 haptaim bilong was em long “biknait.” Dispela taim i kirap klostu long 9 klok long nait i go inap 12 klok long nait. Namba 3 haptaim em “taim kakaruk i krai.” Dispela taim i kirap long 12 klok long nait i go inap long 3 klok long moning. Ating kakaruk i krai long dispela haptaim bilong nait taim ol i arestim Jisas. (Mak 14:72) Namba 4 haptaim bilong was em “bikmoning,” em i kirap long 3 klok long moning i go inap long san i kamap.
Maski ol manmeri long taim bilong Baibel i no gat ol hanwas na klok, ol i gat pasin bilong ol yet long kolim taim long san na long nait.